Mas kúıinde kólik júrgizgen quqyq qorǵaýshy jumysynan aıyryldy
QYZYLORDA. QazAqparat - Qyzylordada avtokólikti mas kúıinde júrgizgeni úshin ishki ister organdarynyń qyzmetkeri jumystan shyǵaryldy, dep habarlaıdy oblystyq prokýratýranyń baspasóz qyzmetinen.
Bıyl polıtsııa qyzmetkerleriniń kinásinen 3 JKO oryn aldy jáne 74 ákimshilik quqyq buzýshylyq jasalypty. Sonyń ishinde ІІD UQKB qyzmetkeri Baıǵazınov avtokólikti mas kúıinde basqarǵany úshin jumysynan shyǵaryldy. Buǵan qosa, burynǵy polıtseı basqarǵan avtokóliktiń aldyńǵy memlekettik nómir belgisi, sondaı-aq júrgizýshi kýáligi bolmaǵan.
Alaıda Baıǵazındi jolda toqtatqan polıtsııa qyzmetkerleriniń isti sońyna deıin jetkizbeýinen eks-polıtseı ákimshilik jazadan qutylyp ketken. Degenmen bul iske prokýratýra aralasyp, atalmysh qyzmetker ishki ister organdarynan shyǵaryldy, al óz isine salǵyrt qaraǵan tulǵalar tártiptik jaýapkershilikke tartyldy.
