Mas kúıinde kólik júrgizgen aqtóbelik jolda áıeldi qaǵyp ketti
AQTÓBE. QazAqparat - Aqtóbede belgilenbegen jerden joldy kesip ótpek bolǵan áıel aýrýhanaǵa tústi, dep habarlaıdy QazAqparat tilshisi.
Oqıǵa 8-shilde kúni saǵat 20:30-da tirkeldi. «Lada Prıora» kóligin basqarǵan júrgizýshi «Mereı» saýda úıiniń aldynda júrginshini qaǵyp ketti. Jaıaý júrginshi de belgilenbegen jerden joldy kesip ótpek bolǵan.
«Jol-kólik oqıǵasy kezinde dene jaraqatyn alǵan áıel oblystyq jedel járdem aýrýhanasyna tústi. Medıtsınalyq saraptama kezinde júrgizýshiniń mas kúıinde kólik basqarǵany anyqtaldy. Qazir osy derekke qatysty Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» baby boıynsha is qozǵaldy, tergeý júrip jatyr», - dep habarlady oblystyq PD baspasóz jetekshisi Erbolat Sarqulov.
