Mas kúıinde kólik basqaryp úshinshi ret ustalǵan adam 10 jylǵa júrgizýshi quqyǵynan aıyrylady - ІІM
ASTANA. QazAqparat - Kólikti mas kúıinde basqarǵany úshin úshinshi ret ustalǵan adam júrgizýshi kýáliginen 10 jylǵa aıyrylyp, 30 táýlikke qamaýǵa alynady. Búgin Parlament Senatynda «Ákimshilik zańnamany reformalaý: problemalar men jetildirý baǵyttary» taqyrybynda ótken konferentsııada QR Іshki ister mınıstriniń orynbasary Erlan Turǵymbaev osylaı dep aıtty.
Mınıstr orynbasarynyń paıymdaýynsha, Ákimshilik quqyq buzýshylyq týraly kodekstiń 467-babynda qarastyrylǵan quqyq buzýshylyqtardyń quramy boıynsha jaza ondaǵy qoǵamdyq qaýipke qatysty bolýy shart. «Máselen, kólikke mas kúıinde otyrǵan júrgizýshi kýáligi bar tulǵa ákimshilik jaýapkershilikke tartylýy tıis. Al júrgizýshi kýáliginen aıyrylǵandar qaıtadan kólik júrgizse, oǵan qylmystyq jaýapkershilik qoldanylýy kerek. Bul rette aıta keterligi, Elbasy tapsyrmasyna sáıkes, «Jol qozǵalysy týraly» zań jobasynyń aıasynda kólikti mas kúıinde basqarǵandarǵa sanktsııany qataıtý qarastyrylyp otyr», - dedi E.Turǵymbaev.
Onyń sózine qaraǵanda, kólikti mas kúıinde basqarǵan adam birinshi ret ustalsa, ony 3 jylǵa deıin júrgizýshi quqyǵynan aıyrý kózdeledi. Bul jaǵdaı ekinshi ret qaıtalansa, ol 6 jylǵa kólik júrgizý quqyǵynan aıyrylady jáne 15 táýlikke qamaýǵa alynady. Al úshinshi ret qaıtalanǵan jaǵdaıda osy azamat 10 jylǵa deıin kólik júrgize almaıdy jáne 30 táýlikke qamaýǵa alynady.
Toqtala ketetin jaıt, ótken jyly elimizde 26 myń jol-kólik apaty oryn alyp, onyń saldarynan 3 myń adam kóz jumǵan.
«Jańa redaktsııadaǵy Qylmystyq kodeks jobasynda mas kúıinde kólik basqarǵandarǵa 500 aılyq eseptik kórsetkishke deıin aıyppul túrinde jaza qarastyrylady nemese olarǵa túzetý jumystary, ne bolmasa 300 saǵatqa deıin qoǵamdyq jumystarǵa tartý jáne 6 aıǵa deıin qamaýǵa alý jazasy qarastyrylǵan», - dedi E.Turǵymbaev.
