Mas kúıde ustalǵan Ulttyq bıýro qyzmetkeri jumystan bosatyldy
ASTANA. QazAqparat - Sybaılas jemqorlyqqa qarsy is-qımyl ulttyq bıýrosynyń qyzmetkeri memqyzmetkerge laıyqty emes minez-qulqy úshin jumystan shyǵaryldy, dep habarlaıdy «QazAqparat» HAA tilshisi vedomstvonyń baspasóz qyzmetine silteme jasap.
Keltirilgen málimetke sáıkes, Baıshıǵashev qoǵamdyq orynda mas kúıde júrgen.
«30 qańtar kúni mas kúıde memlekettik nómiri 247 NMA/01 «Toyota» markaly avtokólikpen júrgen A.O.Baıshıǵashev, Astana qalasynyń ІІD JPQ jol-polıtsııasy qyzmetiniń ókilderine ózin Sybaılas jemqorlyqqa qarsy qyzmettiń tergeýshisi retinde tanystyrǵan. Quqyq buzýshy men onyń qyzmettik kýáligi smartfonnyń kamerasyna túsirilip, vıdeo áleýmettik jelige jarııalanyp ketken», - delingen baspasóz qyzmetiniń habarlamasynda.
Tártiptik komıssııa A.O.Baıshıǵashevtiń qoǵamdyq orynda mas bolyp júrýi Sybaılas jemqorlyqqa qarsy kúres júrgizetin organ qyzmetkerleriniń bedeline nuqsan keltiredi degen sheshimge keldi. Bul óz kezeginde QR memlekettik qyzmetshilerdiń ádep kodeksine qaıshy.
Sybaılas jemqorlyqqa qarsy is-qımyl ulttyq bıýrosynyń ishki qaýipsizdik basqarmasy atalǵan jaǵdaı boıynsha qyzmettik tergeý júrgizip, materıaldyń barlyǵyn zerttedi. Nátıjesinde, atalǵan qyzmetkerdi jumystan bosatý týraly sheshim qabyldandy.
