Mas kúıde rýlge otyrǵan aqtóbelik eks-depýtatqa sot syrttaı qaýly shyǵardy
Aqtóbe qalalyq máslıhatynyń eks-depýtaty Sanııa Muratova aqyry sotqa qatyspady. Sot 15 táýlikke qamaýǵa alý jáne júrgizýshi kýáliginen 7 jylǵa aıyrý qaýlysyn syrttaı shyǵardy, dep habarlaıdy Kazinform.
Aqtóbe qalalyq máslıhatynyń burynǵy depýtaty rýlge mas kúıinde otyrǵany úshin sot aldyna kelip, jaýap berýi tıis bolatyn. Alaıda 5 qyrkúıekte toltyrylǵan hattamaǵa qaýly shyǵarý búginge deıin sozylyp keldi. Ázirge onyń naqty sebebin eshkim bilmeıdi. Sotqa ózi de, qorǵaýshysy da qatyspady, qandaı da bir sebebi bar-joǵyn aıtpady. Sýdıa Qaıyrjan Alashuly hattama toltyrǵan polıtsııa qyzmetkerinen suraǵan kezde ol úıine barǵanyn, alaıda tappaǵanyn aıtty. Sot otyrysy kezinde Aqtóbe qalasynyń prokýrory Daýlet Týleýf 15 táýlikke qamaýǵa alýdy surady.
«ÁQBtK 608-baby 1-bóligimen kináli dep tanylyp, ony 15 táýlikke ákimshilik qamaqqa alyp jáne 7 jyl merzimge kólik quralyn basqarý quqyǵynan aıyrýdy suraımyn», - dedi Daýlet Týleýf. Keıin sýdıa Qaıyrjan Alashuly qaýlyny oqydy.
- Sanııa Muratovanyń kinási hattamamen, medıtsınalyq saraptama qorytyndysymen, beınejazbamen tolyq dáleldendi. Osy baptyń sanktsııasyna sáıkes Sanııa Muratovany 15 táýlikke qamaqqa alý jáne júrgizý kýáliginen 7 jylǵa aıyrý týraly qaýly shyqty. Qaýly dereý oryndaýǵa jatady. Ákimshilik qamaqqa alý merzimi Aqtóbe oblystyq PD júktelsin, - dedi sýdıa Qaıyrjan Alashuly.
Sot ta, prokýror da sot otyrysyna qatyspaı qalǵan Sanııa Muratovanyń isi týraly qandaı da pikir aıtýdan bas tartty.
Eske salsaq, qala máslıhatynyń depýtaty bolyp turǵan kezde Sánııa Muratova mas kúıde kólik júrgizgeni úshin ustalǵan bolatyn.
Keıin ol depýtattyq mandatynan óz erkimen bas tartty.
