Mas kúıde rólge otyrǵan 1 myńnan astam astanalyq jazalandy

ASTANA. KAZINFORM — Mas kúıde nemese esirtki tartyp kólik aıdaǵan jaǵdaıda qandaı jaza qarastyrylǵan? Bul saýalǵa Astana qalalyq prokýrorynyń aǵa kómekshisi Jasulan Sarpekov jaýap berdi. 

— Júrgizýshi kólikti ishimdik iship nemese esirtki tutynyp basqarǵan jaǵdaıda, Ákimshilik kodekstiń 608-babynyń 1-bóligine sáıkes jaýapkershilik kózdelgen. Atap aıtqanda, aıypty 15 táýlikke qamaýǵa alynady jáne 7 jyl merzimge kólikti basqarý quqyǵynan aıyrylady. Eger kólikti basqarý quqyǵynan aıyrylǵan adam qaıtadan mas kúıinde nemese esirtki qoldanyp rólge otyrsa, Qylmystyq kodekstiń 346-baby boıynsha 5 jylǵa deıin bas bostandyǵynan aıyrý qarastyrylǵan, — dedi Jasulan Sarpekov Astana qalasy kommýnıkatsııalar qyzmeti alańynda ótken baspasóz máslıhatynda. 

Odan ári prokýror kómekshisi bıyl qansha adam zań buzǵanyn sóz etti. 

— Jyl basynan beri elorda aýmaǵynda Ákimshilik kodeksti buzǵan 1090 adam jaýapkershilikke tartyldy. Olar 15 táýlikke qamaqqa alynyp, 7 jyl kólik basqarý quqyǵynan aıyryldy. Sonymen qatar 63 adam Qylmystyq kodekstiń 46-baby boıynsha jaýapqa tartyldy, — dep tolyqtyrdy spıker.

Aıta ketsek, taıaýda Astanada mas kúıinde kólik aıdaǵan júrgizýshi polıtsııadan qashyp, patrýldik kólikke soqtyǵysty. 

Sondaı-aq bıyl maýsymda Qostanaıda bas dáriger mas kúıinde kólik júrgizgeni úshin qamaýǵa alyndy.