Mas kúıde kólik aıdaǵan aqtóbelik eks-depýtat qoǵamdyq keńestiń múshesi boldy

AQTÓBE. KAZINFORM – Aqtóbe qalalyq máslıhatynyń eks-depýtaty Sánııa Muratova oblystyq qoǵamdyq keńes múshesi bolyp saılandy. 

Aqtóbe oblystyq qoǵamdyq keńestiń tórt múshesi tizimnen shyǵaryldy. Onyń ornyna taǵy 4 múshesi saılandy. Sonyń biri – byltyr mas kúıinde kólik aıdap, 15 táýlikke qamalǵan eks-depýtat Sanııa Muratova. Qoǵamdyq keńes týraly úlgilik erejeniń 39-tarmaǵyna jáne Aqtóbe oblysynyń qoǵamdyq keńesi tóraǵasynyń hatyna sáıkes saılanǵan kandıdattar tizimin oblystyq máslıhat paraqshasynan kórýge bolady. 

Onda Sánııa Muratovanyń ózin-ózi usynǵany ári fıtnes jelisiniń quryltaıshysy ekeni jazylǵan. Saılanǵan kandıdattardy bekitý týraly qujatqa Aqtóbe oblystyq
máslıhattyń tóraǵasy Gúlqasıma Súıintaeva qol qoıdy.

Aıta keteıik, qoǵamdyq keńeste 28 múshe bar. 

Eske salsaq, Sanııa Muratova byltyr qyrkúıekte mas kúıinde kólik júrgizgeni úshin ustaldy. Keıin ol mandatynan bas tartý úshin saılaý komıssııasyna aryz túsirdi. 

Ol QR Ákimshilik quqyq buzý kodeksiniń «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» jáne «Kólik quralyn mas kúıde júrgizý» baptary boıynsha 15 táýlikke qamaldy. Sonymen birge kólik júrgizý kýáliginen 7 jylǵa aıyryldy.