Mas kúıde kólik aıdaǵan: Aqtóbelik depýtat sotqa kúshtep jetkiziletin boldy
Kólikti mas kúıinde júrgizgen aqtóbelik depýtat Sánııa Muratova sot otyrysyna kelmeı qaldy. Ákimshilik quqyqbuzýshylyq týraly kodekstiń «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy» baby boıynsha qaralǵan iste sýdıa aıyptalýshyny sot otyrysyna kúshtep ákelýge uıǵarym shyǵardy, dep habarlaıdy QazAqparat tilshisi.
Sánııa Muratovaǵa qatysty Ákimshilik quqyqbuzýshylyq týraly kodekstiń «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» (596-bap) jáne «Kólik quralyn mas kúıinde júrgizý» (608-bap) baptary boıynsha is qozǵalǵan bolatyn.
Aqtóbe oblystyq soty baspasóz qyzmetiniń málimetinshe, 596-bap boıynsha is 12 qyrkúıekten bastap qaralǵan. Al 608-bapqa qatysty is 20 qyrkúıek kúni sotqa tústi. Sot kabınetinen «Kólik quralyn mas kúıinde júrgizý» baby boıynsha uıǵarymdy kórýge bolady. Onda sýdıa Qaıyrjan Alashuly alǵashynda iske kedergi keltiretin mán-jaılar tirkelmegenin aıtqan. Keıin isti qabyldap, ony 21 qyrkúıek kúni saǵat 11:50-de WhatsApp Messenger arqyly qaraý týraly uıǵarym shyǵardy. Alaıda Sánııa Muratova baılanysqa shyqpaǵan, sebebin de aıtpaǵan.
«Sánııa Muratova Aqtóbe oblysy Aqtóbe qalasy ákimshilik quqyqbuzýshylyqtar jónindegi mamandandyrylǵan aýdanaralyq sotyna, sot otyrysyna qatysýy úshin kúshtep ákelinsin. Uıǵarymnyń oryndalýy Aqtóbe oblysynyń Polıtsııa departamentine júktelsin. Uıǵarym dereý oryndalýǵa jatady. Uıǵarym oryndalǵanǵa deıin is óndiristen toqtatylsyn», – delingen sýdıa Q. Alashuly shyǵarǵan uıǵarymda.
Eske salsaq, Aqtóbe qalalyq máslıhatynyń depýtaty Sánııa Muratova mas kúıde kólik aıdaǵany anyqtalǵan bolatyn. Keıin ol mandatynan óz erkimen bas tartty.
