Mas kúıde eldiń mazasyn alǵan túrkistandyq ushaqtan qalyp qoıdy
Kóliktegi polıtsııa departamentiniń bastyǵy Ońal Bekıevtiń aıtýynsha, keshe Shymkent qalasy áýejaıynyń qyzmetkeri polıtsııaǵa habarlasyp, alkogolge mas jolaýshynyń kútý zalynda ózin dóreki ustap, bylapyt sóılep, qoǵamdyq tártipti buzǵanyn aıtqan.
Oqıǵa ornyna jetken kóliktegi polıtsııa qyzmetkeri mas jolaýshyny sabyrǵa shaqyrýǵa tyrysqanymen, ol zańǵa qaıshy áreketin tyımaı, qoǵamdyq tártipti buzýyn jalǵastyrǵan. Buzaqy polıtseılerdiń zańdy talabyna baǵynbaı, aıǵaılap sóılep, bılik ókilderine balaǵat sózder aıtqan. Tekserý barysynda quqyq buzýshynyń Túrkistan oblysynyń 37 jastaǵy turǵyny ekendigi anyqtalǵan.
«Atalǵan azamat polıtsııa bólimshesine jetkizilip, onyń ústinen QR Ákimshilik quqyq buzýshylyq týraly kodekstiń 440-baby 1-tarmaǵy, 434-baby 1-tarmaǵy, 667-baby 1-tarmaǵy boıynsha 3 ákimshilik hattama toltyryldy. QR Qylmystyq kodeksiniń 378-baby 1-bóligimen sotqa deıingi tergeý bastaldy», - dedi polıtsııa polkovnıgi.
Medıtsınalyq kýálandyrý qorytyndysyna sáıkes, azamat alkogolge ortasha deńgeıde mas bolǵany anyqtalyp otyr.
«Oǵan qoǵamdyq orynǵa alkogolge mas kúıde kelý faktisimen 5 AEK mólsherinde aıyppul salyndy. Eki ákimshilik bapqa qatysty materıaldar protsessýaldyq sheshim qabyldaý úshin Shymkent qalalalyq mamandandyrylǵan aýdanaralyq ákimshilik sotyna jiberildi. Sonymen qatar bılik ókilin balaǵattaý faktisimen tergeý amaldary júrgizilip jatyr», - dedi ol.