Mas kúıde bótenniń kóligin búldirgen atyraýlyq 5 kúnge qamaldy

ATYRAÝ. KAZINFORM – Atyraý qalasynyń turǵyny mas kúıde bireýdiń kóliginiń ústine shyǵyp, qasaqana búldirgen. Sot qaýlysymen ol 5 kúnge qamaýǵa alyndy.

Atyraý qalalyq ákimshilik quqyq buzýshylyqtar jónindegi mamandandyrylǵan sotynda mas turǵynǵa qatysty QR Ákimshilik quqyq buzýshylyq týraly kodeksiniń 147-1-babynyń 1-bóligimen (Bóten múlikti qasaqana búldirý) ákimshilik is qaraldy. 

Sot talqylaýynda anyqtalǵandaı, oqıǵa 13 mamyrda bolǵan. 

– J. alkogoldik ishimdik ishken orta dárejeli masań kúıde saǵat 7.00 shamasynda EXEED LX avtokóliginiń ústine shyǵyp, aıaǵymen tóbe bóligin maıystyrǵan. Osylaısha, bótenniń múligin qasaqana búldirgen. Onyń kinási ákimshilik quqyq buzýshylyq týraly hattamamen, basqa da is materıaldarmen rastaldy, -dep habarlady atalǵan sottan.

Sot ákimshilik jaza qoldanbas buryn quqyq buzýshy J.-nyń kinásin moıyndap, áreketine ókingenin jaýaptylyǵyn jeńildetetin mán-jaı retinde tanydy.

– Sot qaýlysymen J. ákimshilik quqyq buzýshylyq jasaǵany úshin kináli dep tanyldy. Oǵan 5 táýlik merzimge ákimshilik qamaqqa alý túrindegi jaza qoldanyldy, -dep málim etti sottan.

Sot qaýlysy zańdy kúshine engen joq.

Eske sala ketelik, buǵan deıin Atyraýda 2 jasóspirimge qasaqana dene jaraqatyn salǵan kúdiktiler ustalǵanyn jazǵan edik.