Mas kúıde avtobýs júrgizgenderge qatysty qylmystyq is qozǵaldy
ASTANA.KAZINFORM — El aýmaǵynda jolaýshylar tasymalynyń qaýipsizdigin qamtamasyz etýge baǵyttalǵan «Avtobýs» jedel-profılaktıkalyq is-sharasy ótkizildi. Bul týraly Polisia.kz jazdy.
Shara barysynda Jol júrisi qaǵıdalaryn buzýdyń 22 myńnan astam deregi anyqtaldy, onyń 6 myńǵa jýyǵy jolaýshylar tasymaly salasyna tıesili.
Jolaýshylar men jol qozǵalysynyń ózge qatysýshylarynyń ómiri men densaýlyǵyna qaýip tóndiretin óreskel quqyq buzýshylyqtarǵa erekshe nazar aýdaryldy.
— Jalǵan memlekettik tirkeý nómirimen kólik basqarýdyń 2 deregi, mas kúıinde basqarýdyń 4 deregi jáne kólik quralyn basqarý quqyǵynan aıyrylǵan 3 júrgizýshi anyqtaldy. Sonymen qatar qalaaralyq jáne halyqaralyq baǵyttarda jolaýshylar tasymaldaıtyn avtobýstarda oryndardy zańsyz jabdyqtaýdyń 63 deregi tirkeldi. 61 avtobýs arnaıy aıyp turaǵyna qoıylyp, 102 memlekettik tirkeý nómiri tárkilendi. Sondaı-aq 6 júrgizýshige qatysty kólikti mas kúıde basqarǵany úshin Qazaqstan Respýblıkasy Qylmystyq kodeksiniń 346-baby boıynsha sotqa deıingi tergep-tekserý bastaldy, — delingen habarlamada.
Azamattardyń ómiri men densaýlyǵy — eń joǵary qundylyq. Іshki ister mınıstrligi barlyq júrgizýshini, onyń ishinde jolaýshylar tasymalymen aınalysatyn azamattardy zań talaptary men qaýipsizdik qaǵıdalaryn qatań saqtaýǵa shaqyrady.
Aıta keteıik, Túrkistan oblysynda mas kúıde kólik tizgindegen áıel 3 adamnyń ómirin qıdy.
