MÁS-ke kezek kútý jeńildeıdi: 4 myńnan astam adam elektrondy júıeni paıdalandy
ASTANA. KAZINFORM — Aqmola oblysy men Almaty qalasynda MÁS-ke elektrondy kezek pılottyq rejımde jumys istep jatyr. Júıe arqyly 4 323 adam jazylyp, onyń 4 050-i saraptamadan ótken. Bul týraly Eńbek jáne halyqty áleýmettik qorǵaý mınıstrligi málim etti.
Qazirdiń ózinde MÁS-ke elektrondy kezek arqyly 4 323 adam jazylǵan. Onyń 4 050-i saraptamadan ótip úlgerdi. Bul elektrondy kezekke jazylǵandardyń jalpy sanynyń 94 paıyzyn quraıdy.
Elektrondy kezek arqyly azamattar MÁS bólimine baratyn kún men ýaqytty aldyn ala tańdaı alady. ıAǵnı adam qabyldaýǵa erte kelip, uzaq ýaqyt kezek kútip otyrmaıdy.
Mınıstrliktiń dereginshe, elektrondy kezekke jazylý Áleýmettik qyzmetter portalynda júrgiziledi. Medıtsınalyq uıym qajetti málimetterdi MÁS-ke jibergennen keıin azamattyń telefonyna saraptamaǵa jazylýǵa bolatyny týraly SMS habarlama túsedi.
Odan keıin Áleýmettik qyzmetter portalyndaǵy jeke kabınetke kirip, MÁS-ke jazylý qyzmetin tańdaý qajet. Júıe azamattyń turǵylyqty jerine qaraı qajetti bólimdi avtomatty túrde anyqtaıdy. Sodan keıin bos kúnder men qabyldaý ýaqyttaryn kórsetedi. Azamat ózine qolaıly kún men ýaqytty tańdap, kezekti brondaıdy.
Jazylý aıaqtalǵan soń azamatqa SMS arqyly MÁS bóliminiń qabyldaý kúni, ýaqyty, mekenjaıy jáne elektrondy kezek nómiri jiberiledi.
— Qabyldaýǵa úsh kún qalǵanda júıe azamatqa qosymsha eskertý habarlamasyn joldaıdy. Eger adamnyń jospary ózgerip, belgilengen ýaqytta bara almaıtyn bolsa, jazylýyn jeke kabıneti arqyly óz betinshe toqtata alady. Al azamat belgilengen ýaqytta kelmegen jaǵdaıda, onyń jazbasy avtomatty túrde joıylady, — dep habarlady vedomstvodan.
Aqmola oblysynda jyl basynan beri elektrondy kezek arqyly 2 288 adam MÁS-ke jazylǵan. Onyń 2 118-i, ıaǵnı 92,5 paıyzy saraptamadan ótti.
Al Almaty qalasynda bul qyzmet 12 maýsymnan bastap jumys istep keledi. Osy ýaqyt ishinde 2 035 adam elektrondy kezekke jazylyp, onyń 1 932-si MÁS-ten ótti.
Jańa tásil ásirese shalǵaı eldi mekenderde turatyn azamattarǵa yńǵaıly. Aldyn ala jazylý sapardy josparlaýǵa múmkindik beredi. Azamat MÁS bólimine belgilengen ýaqytqa qaraı keledi. Joba iske qosylǵan kezde Eńbek mınıstrligi keıbir eldi meken turǵyndary oblys ortalyǵyna jetý úshin 400 shaqyrymnan astam jol júretinin atap ótken bolatyn.
Elektrondy kezek medıtsınalyq-áleýmettik saraptamanyń tártibin ózgertpeıdi. Onyń kómegimen azamat MÁS bólimine baratyn ýaqytyn aldyn ala belgileıdi. Osylaısha bólimde kezek kútý ýaqyty qysqarady.
Pılottyq joba aıaqtalǵannan keıin onyń nátıjesi baǵalanady. Elektrondy kezekti elimizdiń basqa óńirlerinde de engizý múmkindigi qaralady.
Eske sala keteıik, buǵan deıin múgedektigi bar balalardy úı jaǵdaıynda ońaltý jobasy taǵy tórt óńirde iske qosylatynyn jazdyq.
