Mas er adam Atyraý-Aqtóbe jolaýshylar poıyzynyń tejegishin julyp alǵan
Kóliktegi polıtsııa departamenti bastyǵynyń birinshi orynbasary Madııar Aıtýǵanovtyń aıtýynsha, jedel tejegishtiń saldarynan jolaýshylar poıyzy ýaqytynan 12 keshikken.
«Polıtsııa qyzmetkerleri Aqtóbe oblysynyń 59 jastaǵy turǵynyn ustady. Onyń vagonnyń tambýryndaǵy shuǵyl toqtatý tetigin julyp alǵany anyqtaldy. Medıtsınalyq kýálandyrý qorytyndysyna sáıkes ustalǵan adamnyń ortasha dárejeli alkogoldik mas kúıde ekeni beldi boldy. Ol Saǵyz stantsııasyna kelgennen keıin poıyzdan túsirildi. Oǵan qatysty QR Ákimshilik quqyq buzýshylyq týraly kodeksiniń 440-babynyń 1-bóligimen (Alkogoldik ishimdikterdi ishý nemese qoǵamdyq oryndarǵa masań kúıde kelý), 560-babynyń 1-bóligimen (Júk poezdarynda zańsyz júrip-turý, poezd júrip bara jatqanda otyrǵyzý jáne túsirý, vagondardyń tepkishekteri men tóbesinde júrip-turý, qajetsiz rette poezdy zańsyz toqtatý) ákimshilik hattamalar toltyryldy. Oǵan 10 aılyq eseptik kórsetkish mólsherinde, ıaǵnı 34 500 teńge aıyppul salyndy», -deıdi Madııar Aıtýǵanov.
Onyń aıtýynsha, jyl basynan beri departament qyzmetkerleri 18 774 ákimshilik quqyq buzýshylyqty anyqtaǵan. Onyń ishinde alkogoldik ishimdikterdi iship, qoǵamdyq oryndarda mas kúıinde júrgen 1 966 adam bar. Sondaı-aq, poıyzdy shuǵyl toqtatý tejegishin buzýǵa baılanysty 13 jaǵdaıy tirkelgen.
Eske sala ketelik, buǵan deıin Atyraý oblysynda júk poıyzy men jeńil kólik soqtyǵysyp, bir adam mert bolǵanyn habarlaǵan edik.