Mas bolyp mototsıkl aıdap, kisi ólimine sebepshi bolǵan Qostanaı turǵyny sottaldy

QOSTANAI. QazAqparat - Qostanaı aýdandyq sotynda mas kúıinde kólik júrgizip, jol apatyn jasaǵan, osylaısha abaısyzda adam ólimine ákep soqtyrǵan K-ǵa qatysty qylmystyq is qaraldy, dep habarlaıdy QazAqparat.

Sottyń málimetinshe, is Qylmystyq kodekstiń 345-1-babynyń 3-bóligi boıynsha qaralǵan.

4 sáýirde Qostanaı aýdany Moskovskıı aýylynda júrgizýshi K. mas kúıinde mototsıkl tizgindep kele jatyp, qarsy jolaqqa shyǵyp ketken. Sóıtip qarsy baǵytta kele jatqan avtokólikpen betpe-bet soqtyǵysqan.

Jol-kólik oqıǵasynyń saldarynan sottalýshy K-nyń mototsıkl kýzovynyń jolaýshy oryndyǵynda otyrǵan jolaýshy L. alǵan jaraqatynan oqıǵa ornynda kóz jumdy.

Prokýror sottalýshyny 10 jylǵa kólik basqarý quqyǵynan aıyra otyryp, 3 jylǵa bas bostandyǵynan aıyrýdy surady.

Jábirlenýshi - marqumnyń anasy sotta sottalýshyǵa bas bostandyǵynan aıyrmaıtyn jaza taǵaıyndaýdy surady.

Sottalýshy óz kinásin jáne talaptaryn tolyq moıyndap, jábirlenýshiden keshirim surady.

Sot jaza taǵaıyndaý kezinde sottalýshy K-nyń jaýapkershiligi men jazasyn jeńildetetin mán-jaı retinde óz kinásin ashyq moıyndaýyn jáne jasaǵan isine ókinetinin, sondaı-aq kámeletke tolmaǵan balasynyń baryn eskerdi.

Sottalýshy 10 jyl merzimge kólik basqarý quqyǵynan jáne 3 jylǵa bas bostandyǵynan aıyryldy. Ol jazasyn eń tómengi qaýipsizdik qylmystyq-atqarý júıesi mekemesinde óteıdi.

Úkim zańdy kúshine engen joq.