Mas bolyp kólik júrgizgen aqtóbelik depýtat mandatynan bas tartty

Aqtóbe qalalyq máslıhatynyń depýtaty Sanııa Muratova mandatynan bas tartý úshin saılaý komıssııasyna aryz túsirdi, dep habarlaıdy QazAqparat tilshisi.

Sanııa Muratova Aqtóbe qalalyq aýmaqtyq saılaý komıssııasyna aryz túsirdi.

«Sanııa Muratova óz mandatynan bas tartatynyn aıtyp, keshe aryz jazdy. Zań boıynsha depýtat 8 túrli sebeppen óz ókilettiligin toqtata alady. Shetelge nemese basqa aımaqqa kóship ketse, QR azamaty bolmasa, depýtattyq qyzmetin atqarmasa, qylmystyq jaýapqa tartylyp, jazalansa, sot sheshimimen mandatynan aıyrylsa da qalalyq máslıhatqa usynys jiberiledi. Sheshimdi qalalyq máslıhat qabyldaıdy»,- dedi Aqtóbe qalalyq aýmaqtyq saılaý komıssııasynyń tóraǵasy Dına Qalmaǵambetova.

Onyń aıtýynsha, búgin komıssııa sheshim qabyldap, usynys jiberiledi.

«Aqtóbe qalalyq aýmaqtyq saılaý komıssııasyna aryz túsirgen soń bizge usynys jiberiledi. Sessııada qaralyp, depýtattar sheshim qabyldaıdy»,- dedi Aqtóbe qalalyq máslıhatynyń tóraǵasy Anar Darjanova.

Aıta keteıik, eger Sanııa Muratova depýtattyq ókilettiligin toqtatsa saılaý taǵaıyndalǵany týraly qaýly 60 kún buryn shaǵyrylady. Sodan keıin bir okrýgte saılaý ótedi.

Eske salsaq, Sanııa Muratova mas kúıinde rýlge otyryp, jol-kólik erejesin buzdy.

Júrgizýshige QR Ákimshilik quqyq buzý kodeksiniń «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» jáne «Kólik quralyn mas kúıde júrgizý» baptary boıynsha hattama toltyrylyp, materıal jınaldy.

Alaıda is áli sotqa túspedi.