Mas adamdy birden aıyqtyratyn tabletkalar bar ma
ASTANA. QazAqparat - Astana qalalyq 1 emxananyń toksıkologııa bólimshesiniń meńgerýshisi Galına Bashınskaıanyń aıtýynsha, ondaı dári-dármekter bar. Biraq ondaı tabletkalar tegin em-domnyń sanatyna jatpaıdy, dep xabarlaıdy QazAqparat tilshisi.
«Iá, ondaı tabletkalar bar. Olar adamǵa araqtan tez aıyǵyp ketýine kómektesedi. Bylaısha aıtqanda, aşy sýdan aıyǵý protsesin shapshańdatady. Dál qazir ol preparattar Astanada satyla ma, joq pa, ony naqty aıta almaımyn. Bilýimshe, Qazaqstan aýmaǵynda ondaı tabletkalardyń tirkeý merzimi aıaqtaldy. Bir kezderi ony dárixanalarda satqan. Biz bolsaq, osy sanatqa jatatyn preparattardy qoldanbaımyz. Óıtkeni ol tegin medıtsınalyq qyzmet túrine jatpaıdy», - dedi Bashınskaıa QazAqparat tilshisine bergen suxbatynda.
Osyǵan baılanysty toksıkologııa bólimshesiniń meńgerýshisi Jańa jylda spırttik ishimdikterdi mólsherden kóp ishpeýge keńes berip otyr. Sondaı-aq árbir adamnyń mólsheri ártúrli ekenin taǵy bir márte eske saldy.
«Aldymen qańtardyń 1-kúni qandaı jaǵdaıda turatynymyzdy umytpaýymyz qajet. Em qabyldaıtyn adamdarǵa asa saq bolǵan durys. Sebebi barlyq dári-dármekter spırttik ishimdiktermen qatar qabyldaýǵa kele bermeıdi. Bas jazýǵa bolady. Biraq 50-70 grammnan asyrmaý qajet. Óıtkeni onyń arty merekeniń «jalǵasy» bolyp ketedi», - deıdi G.Bashınskaıa.
Aıta keteıik, bólimshe meńgerýshisi Astanada jańa jyldyq korporatıvter kezinde toksıkologııaǵa túskenderdiń qanshalyqty kóp bolǵany jaıynda aıtyp berdi.
