Marjan Arapbaeva, Ádil Ahmetov, Jeńis Seıdýllauly azyq-túlik paketin ázirleýge kómektesti

NUR-SULTAN. QazAqparat – «Jas Otan» jastar qanatynyń belsendileri karantın kezinde muqtaj otbasylarǵa áleýmettik mańyzy bar azyq-túlik taratýdy jalǵastyrady, dep habarlaıdy QazAqparat tilshisi.

«Bıyl 19 naýryzda Elbasy Nursultan Nazarbaev «Biz birgemiz» aktsııasyn jarııalaǵan edi. Osylaısha, arnaıy qor qurylyp, ómirlik qıyn jaǵdaıǵa tap bolǵan, az qamtylǵan, kópbalaly otbasylarǵa, qart adamdarǵa kómek kórsetilip keledi. Respýblıka boıynsha 155 myń otbasyna jáne astanalyq 2 myń dárigerge 50 myń teńgeden berildi. Elordada 5 myńǵa jýyq otbasy áleýmettik mańyzy bar azyq-túlik paketin aldy», - dep atap ótti «Jas Otan» jastar qanaty Baılanys jáne halyqaralyq yntymaqtastyq basqarmasynyń jetekshisi Ersaıyn Amrın.

Onyń aıtýynsha, azyq-túlik paketin taratýdyń ekinshi kezeńi qolǵa alyndy. Osylaısha, taǵy 6 myń otbasy qajetti azyq-túlikpen qamtamasyz etilmek.

«Árbir pakette un, qant, makaron, kúrish, maı, tuz, sháı syndy 14 ataýly eń qajetti azyq-túlik bar. Oǵan dıstrıbıýtor bolyp «Magným» saýda jelisi bekitildi. Sondaı-aq, qor qarajatyna Nur-Sultan, Almaty, Shymkent qalalaryna 5 mln medıtsınalyq maska alǵan edi. Azyq-túlik paketterine de 50 dana maskadan salynǵan», - deıdi spıker.

Azyq-túlikti ólshep, qaptap, kólikke tıep, jetkizý jumystaryn 300-ge jýyq jasotandyq erikti tegin atqaryp keledi.

«Kún saıyn qala ákimdigi bergen tizim boıynsha azyq-túlik paketin ár úıdiń aldyna deıin jetkizemiz jáne úı ıesimen ara qashyqtyqty saqtaımyz. Bul kómekti de adamdar ártúrli qabyldaıdy. Kópshiligi qýanyshpen alǵystaryn jetkizedi jáne keshiktińder dep synǵa alatyndar da barshylyq. Óıtkeni, bizge eriktiler sany jetispeıdi. Jalpy azyq-túlik paketi kópbalaly, asyraýshysynan aıyrylǵan, múgedek bala tárbıelep otyrǵan nemese jumyssyz otbasylarǵa beriledi», - dep túsindirdi E. Amrın.

Sonymen birge, azyq-túlik paketin ázirleýge birqatar óner juldyzdary kómektesti. Olardyń qatarynda Jeńis Seıdýllauly, Marjan Arapbaeva jáne Ádil Ahmetov bar.

«Qaıyrymdylyq - júrektiń jylýyn syılaı bilý dep aıtady. Sondyqtan, bul - eń uly qasıettiń biri. Osyndaı syn-saǵatta qaıyrymdylyq jasap, birligimizdi kórsetkenimiz durys dep oılaımyz. Yntymaq, sabyrlyq, shydamdylyq - bizdiń qanymyzda bar qasıetti dúnıe. Muqtaj adamdarǵa qaıyrymdylyq kórsetip, azyq-túlik jetkizýdi sizder men bizdiń qosylyp jasap jatqanymyzǵa qýanyshtymyz. Myqty bolaıyq, bir-birimizge jaqyn bolaıyq. Qazaqsha aıtqanda, indettiń kóbi ketip, azy qaldy. Eń bastysy, tártipti saqtap, múmkindiginshe úıden shyqpaı, sál shydasaq, indetti jeńetinimizge senemin. Jeke ózim «Nur Otan» partııasynyń múshesi retinde, sosyn «Jas Otan» jastary jasap jatyr degen soń, jastarǵa úlgi kórsetý úshin usynysty qýana qabyldadym», - dedi «Qazaqkontsert» memlekettik kontserttiń uıymynyń basshysy Jeńis Seıdollauly.

Uıymdastyrýshylardyń aıtýynsha, atalǵan aktsııa mamyr aıynyń ortasyna deıin jalǵasady.