«Mary Kay» qaıyrymdylyq sharalarynyń maqsaty «Búkil álemdegi áıelder men balalar ómirin jaqsartý» - K.Kýlınıch
Y. Qańtardyń 26-sy. QazAqparat / Ádilet Musahaev / - Álemniń 38 elindegi «Mary Kay» kompanııasynyń qyzmeti qaıyrymdylyqpen tyǵyz baılanysty.
Bul jaıynda «Merı Keı (Qazaqstan)» JShS-niń Bas dırektory Konstantın Kýlınıch búgingi ótken baspasóz máslıhatynda aıtty, dep habarlaıdy QazAqparat.
Mary Kay qaıyrymdylyq qory 1993 jyly qurylǵan. Jumys istep jatqan ýaqyty ishinde qor áıelderge zorlyq-zombylyq kórsetýdi boldyrmaý baǵdarlamalaryn qoldaýǵa 18 mıllıon dollar jumsasa, áıelderdegi rak aýrýlaryn zertteýge 12 mıllıonnan astam dollar jumsaǵan.
Al, «Merı Keı (Qazaqstan)» qurylǵan kúninen bastap qaıyrymdylyq jobalaryn qoldaýdy júzege asyryp keledi, jetim balalarǵa, aýyr naýqas balalarǵa, memlekettik medıtsına jáne ınternat mekemelerine, sondaı-aq balalar úılerine kómek kórsetý úshin qarajat jınaý aktsııalaryn júrgizedi. Tek 2009 jyl ishinde 27 qazaqstandyq balalar úıleri men ınternattaryna jalpy 4 200 000 teńge kólemindegi somaǵa kómek kórsetilgen.
«2006 jyly Respýblıkalyq «Balbulaq» balalardy saýyqtyrý ortalyǵyna 50 000 dollar kólemindegi somaǵa medıtsınalyq jabdyq satyp alyndy. 2008 jyly nashar estıtin balalarǵa arnap 50 000 dollardan astam somaǵa kohlearlyq ımplantattar jáne Pedıatrııa jáne balalar hırýrgııasy ǵylymı ortalyǵyna 6 000 000 teńge kólemindegi somaǵa arnaıy medıtsınalyq jabdyq jetkizildi. Ústimizdegi jyly Kompanııa A. N. Syzǵanov atyndaǵy Ulttyq ǵylymı hırýrgııa ortalyǵy úshin jabdyq satyp alýǵa qarajat jınaýǵa baǵyttalǵan «Ómirdi ózgertetin tús» atty qaıyrymdylyq sharasyn júrgizdik. Bul sharanyń maqsaty - týa bitti júrek aqaýymen aýyratyn balalardyń ómirin saqtap qalý. Shara qorytyndysy boıynsha 7 500 000 teńge kólemindegi qarjyǵa jabdyq satyp alyndy», deıdi K.Kýlınıch.
