Marvel sýretshisi Comic Con Astana-da kásibı komıks jasaýdyń qyr-syrymen bólisti
ASTANA. KAZINFORM — Marvel jáne DC Comics baspalarymen jumys istegen ıtalııalyq komıks sýretshisi Paolo Pantalena Comic Con Astana 2026 festıvaline arnaıy qonaq retinde keldi. Ol Kazinform tilshisine shyǵarmashylyq joly, álemdik komıks ındýstrııasyndaǵy tájirıbesi jáne Qazaqstannan alǵan alǵashqy áseri týraly áńgimeledi.
Paolo Pantalena Red Hood, Deathstroke, Batman: Shadow War jobalarymen, sondaı-aq Marvel-diń War of Kings jáne What If…? komıksterimen jumys istegen. Sýretshiniń aıtýynsha, Comic Con Astana-ǵa qatysý oǵan óz óneri men tájirıbesin kópshilikpen bólisýge múmkindik berip otyr.
— Munda qonaq retinde kelgenime qýanyshtymyn. Óz tájirıbem men ónerimdi osyndaǵy adamdarmen bólisý maǵan erekshe shabyt syılaıdy. Kópshiliktiń shyǵarmashylyǵyma, tájirıbeme jáne osy deńgeıge qalaı jetkenime qyzyǵýshylyq tanytyp jatqanyn baıqap otyrmyn, — dedi spıker.
Paolo Pantalena Qazaqstanǵa alǵash ret kelip otyr. Sýretshiniń aıtýynsha, buǵan deıin týǵan elinen munshalyq alys saparǵa shyqpaǵan.
— Qazaqstanǵa alǵash ret keldim. Buǵan deıin mundaı alys saparǵa shyǵyp kórmeppin. Kelgenimizge eki-aq kún bolǵandyqtan, ázirge kóp jerdi aralap úlgergen joqpyn. Biraq jergilikti mádenıet pen adamdardy jaqynyraq tanyǵym keledi. Munda taǵy úsh-tórt kún bolamyn. Sonda qalany barynsha kóbirek aralaýǵa tyrysamyn. Qazaqstanda uzaǵyraq qalǵym keledi, alaıda oǵan múmkindik bolmaı tur, — dedi ol.
Paolo Pantalena komıks salýǵa 13 jasynan bastap qyzyǵa bastaǵan. Óziniń sózinshe, jasóspirim shaǵynda birqatar baspamen jumys istegen. Keıin tájirıbe jınaqtap, portfolıosyn Marvel redaktorlaryna joldaǵan.
— 13 jasymda sýret salýǵa erekshe qyzyǵatynymdy túsindim. Qabiletim bar ekenin de sezdim. Sodan aldyma maqsat qoıyp, soǵan jetý úshin talmaı jumys istedim. Bastapqyda ata-anam bul tańdaýymdy asa quptaı qoıǵan joq. Biraq óz qalaýymnan bas tartqan joqpyn. Keıin tájirıbe jınaqtap, ózimdi daıyn sezingen kezde portfolıomdy Marvel redaktorlaryna jiberdim. Olar álemniń ár túkpirinen talantty sýretshilerdi irikteıdi. Maǵan múmkindik berip, osylaısha Marvel-men jumys isteı bastadym, — dedi sýretshi.
Qazir Paolo Pantalena DC Comics-pen de jumys istep júr. Ol Betmenge arnalǵan jańa týyndylaryn jyl sońyna qaraı kópshilikke usynýdy josparlap otyr.
— Qazir DC-men birlesip jumys istep jatyrmyn. Olar úshin kartalar men Betmenniń muqabalaryn ázirlep júrmin. Bul jumystar jyl sońyna qaraı jaryq kóredi dep josparlanyp otyr, — dedi Paolo Pantalena.
Aıta keteıik, búgin Comic Con Astana 2026 festıvaliniń ekinshi kúni ótip jatyr. Pop-mádenıet jankúıerleriniń basyn qosqan festıval 6 tamyzda bastaldy jáne 9 tamyzǵa deıin jalǵasady.
