Mártókke qosh keldińiz: Aqtóbelik jas maman týǵan jerge saıahattaýǵa shaqyrady
AQTÓBE. KAZINFORM — Abylaıhan Balmuhan oqý bitirgen soń týǵan jerine oraldy. Ol qazir «Mártókke qosh keldiń!» jobasyn qolǵa alyp, aýyldyń týrızmin damytýdy bastady. Jas maman ózi túsirip, ózi óńdegen foto, vıdeo materıaldaryn #Qazalemi heshtegimen jarııalady.
Aqtóbe oblysy Mártók aýdany — kópultty ólke. Reseımen shekaralas aýdanda halyq sany 30 myńǵa jýyqtaıdy. Aýyl sharýashylyǵy salasynda egin sharýashylyǵy jáne mal sharýashylyǵy jaqsy damyǵan. Osy ólkede týyp-ósken Abylaıhan Balmuhannyń balalyq shaǵy Keńsaharada ótken.
Mektep bitirgen soń T.Júrgenov atyndaǵy óner akademııasynda kıno jáne TD operatory mamandyǵyn aldy. Qolyna dıplom alǵan soń Qazaqfılmde túrli qysqametrajdy fılm túsirip, tájirıbesin shyńdady. Sol kezde koronavırýs ınfektsııasy órship, ol aýylǵa oraldy. Sodan bergi bar jospary, jumysy týǵan jerdi damytý, kórkeıtý, damytýǵa baǵattaldy, jeke kásippen aınalysty. Qazir Mártók aýdandyq jastar resýrstyq ortalyǵynyń mamany.
— Oqýshy kezden bastap kameraǵa qumar boldym. Ol kezde toı-dýman túsirip, otbasylyq keshterdiń ádemi sátterin taspaladym. Almatydan aýylǵa kelgen soń shyǵarmashylyq kúızeliske ushyradym. Karantın, bári jabyq turdy. Osy sátte «Mártókke qosh keldińiz!» jobasyn bastadym. Mamandyǵym da, qolymnan keletin de osy is, vıdeo túsirý bolǵan soń qaıta túledim. Sóıtip qolǵa qaıta kamera alyp, aýdanymyzdyń keremet jerlerin túsire bastadym. Kún saıyn kórip, bilip júrgen soń baıqalmaıdy, ańǵarmaıdy. Shyn máninde shaǵyn ǵana aýyldyń ózinde qaıtalanbas tabıǵat, qaıtalanbas adamdar men kóńilge jylý uıalatar ásem sátter bar. Osyny nysanaǵa alyp túsire berdim. Adamdar óz jerin, týǵan ólkesin tanı bastady, — dedi Abylaıhan Balmuhan.
Sóıtip jas mamannyń ıdeıasynan, shiberliginen týǵan týyndylar kóp arasyna taralyp ketti. Qazirgi kezde Abylaıhan Balmuhan týrmarshrýt ázirlep qoıǵan. Alǵashqysy Mártóktiń Aq qaıyń ormanynda ótti.
Keıin osy baǵyttaǵy jobasyn jetildirip, damytýdy kózdep otyr. Al #Qazalemi heshtegimen shyqqan konkýrs ol bastaǵan isti ári qaraı tanytýǵa dem beredi degen oıda.
— 2021 jyly týǵan jerim Keńsaharaǵa kóp aqqý keldi. https://www.instagram.com/p/CQN6JdwB5Zr/ Negizi men oqýshy kezde de osy sátti tamashalaý úshin saıǵa túsetin edim. Tek úsh jyl buryn ǵana sol jerdiń vıdeosyn túsirip, áleýmettik jelige saldym. Adamdar «mynaý bizdiń Mártók pe» dep surap jatty. Keıin ár aýyldy túsirip, sala bastadym. Tek tabıǵat keremetterin emes, qarapaıym eńbek adamdaryn, balalardyń qýanyshty sátterin de qalt jibermeımin. Meniń oıymsha, týrızm shyǵyny joq, tabys ákeletin sala. Al vıdeograftardyń qosar úlesi, túsirip, taratý, tanytý. Bizdiń aldymyzda aǵalarymyz bar, biz olardyń izbasarymyz. Sol izben men de Mártókti tanytqym keledi. Konkýrsqa da qatysyp, baq synaımyn. Munda ádemi dúnıe kóp, sony kórsetip, tanyta beremin. Búgin bolmasa erteń kómegi tıedi, taspadaǵy dúnıe tarıhqa aınalady. Arada 50 jyl ótkende bálkim qarap, tanyp, biler. Men óz jumysymdy qazaq tilinde júrgizemin. Týǵan jerimdi qazaq tilinde tanytamyn, týrızmniń alǵa jyljýyna úles qosamyn dep sheshtim, — dedi Abylaıhan Balmuhan.
Eske salsaq, elimizde #Qazalemi heshtegimen konkýrs ótip jatyr. Oǵan kez kelgen qazaqstandyq qatysa alady. Bar bolǵany qystyń keremet sátterin foto, vıdeoǵa túsirý kerek.
Osy ýaqytqa deıin oǵan kóptegen qazaqstandyq qatysyp keledi.
Máselen osyǵan deıin týǵan jeriniń sulýlyǵyn vıdeo arqyly kórsetken Túrkistan oblysynyń aýyl turǵyny týraly jazǵan bolatynbyz.
Sondaı-aq, baıqaýǵa qatysqan Kentaý turǵyny qalanyń qysqy kórinisi beınelengen sýretter jarııalaǵany habarlandy.
Budan bólek, qostanaılyq oqýshy áleýmettik jelide týǵan jerge degen súıispenshiligin kórsetkeni de málim boldy.
Sonymen qatar, Baıan taýlarynyń amanatyn arqalap júrgen Taısııa týraly da jazdyq.
Baıqaýǵa qatysyp jatqan tarazdyq boıjetken Jambyl taýlarynyń sulýlyǵyn jelide kórsetti.