Martırosıan Golovkınmen jekpe-jekte álemdi tańǵaldyrmaq

ASTANA. QazAqparat - Amerıkalyq úmitker Vanes Martırosıan 5 mamyr kúni birneshe nusqa boıynsha orta salmaqtaǵy álem chempıony Gennadıı Golovkındi jeńip, sensatsııa jasaýda óz múmkindigine senedi, dep habarlaıdy Sports.kz.

Qazir Martırosıan SNAC sport ortalyǵynda burynǵy UFC chempıony Ronda Roýzıdiń jattyqtyrýshysy bolǵan Edmond Tarverdıanmen birge daıyndyq júrgizip jatyr.

«Men bul múmkindikke álemdi tańǵaldyrý úshin ıe boldym. Men robotpen judyryqtaspaımyn. GGG - qarapaıym adam, ony jeńýge bolady. Men osy jekpe-jekke qumartyp otyrmyn. Qazir SNAC-ta jattyǵyp jatyrmyn, bizde jeńis úshin jospar bar ekendigine senemin», - dep keltiredi Boxingscene.com Martırosıannyń sózin.

Golovkın men Martırosıan kezdesýi 5 mamyrda Los-Andjeles mańyndaǵy Karsonda (Kalıfornııa shtaty) StubHub Center arenasynda ótedi.

Foto: worldboxingnews.net