Martın Mıýrreı: Golovkınniń osal tusy joq
ASTANA. QazAqparat - Orta salmaqta óner kórsetetin brıtandyq boksshy Martın Mıýrreı (29-1-1, 12 KO) álem chempıony Gennadıı Golovkınniń (31-0, 28 KO) boıynan birde-bir álsiz jer tappady. Eki kúnnen soń ol Golovkınmen bir sharshy alańda kezdesedi. Degenmen, Martın oǵan bas qatyryp júrgen joq, sebebi chempıonnyń osal jerlerin jekpe-jek barysynda anyqtaýdy josparlaýda.
«Shynyn aıtqanda, Golovkınde osal jer kóre almadym, - deıdi Mıýrreı. - Men Serhıo Martınes pen Felıks Shtýrmmen judyryqtasqanda, olar bunyń aldynda jeńilip kórgen edi. Sondyqtan biz olardyń álsiz tustaryn kórýge múmkindigimiz bar boldy. Biraq Golovkın eshqashan jeńilip kórmegen, tipti nokdaýn almaǵan. Sonymen qatar ol Martınes pen Shtýrmǵa qaraǵanda jas, áleýeti zor».
Onyń sózine qaraǵanda, Mıýrreıdiń bapkerleri Golovkınge qarsy judyryqtasýdyń amaldaryn jasap, birneshe josparlar qurastyrǵan.
«Biz qol qýsyryp otyrǵan joqpyz, josparlarymyz senbi kúni oryndalady dep úmittenemin. Josparlarymyzdyń jalpy sany 10. Olar jekpe-jektiń órbýine baılanysty qoldanylady», - dep atap ótti boksshy.
«Men Golovkınmen 12 raýnd boıy judyryqtasýǵa daıynmyn. Men daıyndyq barysynda eshqashan buryn-sońdy osylaı berilip jattyqpadym, búginde men mansabymdaǵy eń úzdik formaǵa jettim dep oılaımyn. Endi esh ókinbeıtindeı eń keremet jekpe-jek ótkizý ǵana qaldy», - dedi ol.
