Mártebeli meımandarmen kezdesýler ótkizdi
Elbasynyń Ispanııa Koroldigi Depýtattar kongresiniń tóraıymy Ana Pastormen ótken kezdesýinde ekijaqty baılanystardyń birqatar máseleleri aıtyldy. Bul júzdesýdiń eń bir mańyzdy tusy Prezıdent N.Á.Nazarbaevqa Ispanııa Koroli VI Felıpeniń atynan Katolıktik Izabella Ordeniniń tabys etilýi boldy. Bul Ispanııa eliniń eki jaqty áriptestikti damytýdaǵy Elbasy eńbegin laıyqty baǵalaǵany, árıne. Atalǵan Ordendi Ispanııa Koroldigi Depýtattar kongresiniń tóraıymy Ana Pastor tabys etti.
«Asa mártebeli Qazaqstan Respýblıkasynyń Prezıdenti Nursultan Nazarbaev myrza, joǵary koroldik qurmet retinde, Sizdi Katolıktik ¬Izabella Ordenimen marapattaımyn» delingen Koroldiń jarlyǵynda. Elbasy óz sózinde elimiz táýelsizdigimizdiń alǵashqy kúnderinen bastap Ispanııa Koroldigimen baılanys ornatyp, ózara senimdi ekijaqty qarym-qatynastarǵa qol jetkizgenin aıtty.
Osy jyldar ishinde ¬Ispanııa Qazaqstanǵa óz qoldaýyn kórsetip kele jatqanyn tilge tıek etti. «Ispanııa Koroli VI Felıpe Qazaqstanǵa resmı saparmen kelip, «EKSPO - 2017» halyqaralyq kórmesiniń ashylýyna qatysty. Biz úshin bul zor mártebe» dedi. Memleket basshysy Ispanııa Koroli VІ Felıpe men úkimetine joǵary marapaty úshin jyly lebizin bildirip, Korol І Hýan Karlos pen onyń jubaıy Sofııa Patshaıymǵa amandyq jáne tabys tiledi.
Qazaqstan Prezıdenti elimizge saparmen kelip, «EKSPO-2017» halyqaralyq kórmesinde Ispanııa pavılonynyń ashylýyna qatysqany úshin A.Pastorǵa alǵys aıtty. - Kórmemizdiń ashylý saltanatyna 17 shet memleketter jáne úkimetter basshylarymen birge, Ispanııa Koroli VI Felıpe de qatysqan bolatyn.
Biz osy is-shara aıasynda júzdestik. Asa mártebeli Ispanııa Koroli Qazaqstanǵa qyzyǵýshylyq tanytyp, birqatar iskerlik kezdesý ótkizdi, - dedi Memleket basshysy.
Nursultan Nazarbaev elderimiz arasynda ekijaqty dostyq qarym-qatynas ornaǵanyn, ekonomıka men saıasattaǵy baılanystarymyz jemisti damyp kele jatqanyn aıtyp, halyqaralyq kún tártibindegi máseleler boıynsha ustanymdarymyz uqsas ekenine toqtaldy.
«Qazaqstanǵa sapary kezinde Asa mártebeli Ispanııa Korolimen birge Ispanııanyń isker toptar ókilderi men úkimet músheleri keldi. Olar Qazaqstandaǵy áriptesterimen jemisti kelissózder ótkizdi», - dedi Qazaqstan Prezıdenti.
Ispanııa Koroldigi Depýtattar kongresiniń tóraıymy memleketterimiz arasynda dostyq qarym-qatynas ornaǵanyn aıtyp, Ispanııa delegatsııasyna dástúrli túrde qonaqjaılyq kórsetkeni úshin rızashylyq bildirdi.