Marsta sýdyń birneshe ret bolǵanyn dáleldeıtin belgiler tabyldy – NASA
ASTANA. KAZINFORM – NASA-nyń Perseverance marsohody Marstaǵy Ezero kraterindegi taý jynystarynyń sýmen keminde úsh ret áreketteskenin kórsetetin dálelder tapty. Bul Qyzyl ǵalamshardyń sýly ótkeni týraly jańa málimetter beredi, dep habarlaıdy Communications Earth & Environment jýrnaly.
Zertteý nátıjeleri ejelgi kóldiń jaǵalaýymen shektesetin Ezero krateriniń ishki jıegindegi «Margin Unit» dep atalatyn geologııalyq aımaqtan alynǵan. Ǵalymdar bul jerden shógindi taý jynystaryn tabamyz dep kútken. Alaıda Perseverance onyń ornyna sýmen birneshe ret árekettesýdiń izderi saqtalǵan magmalyq taý jynystaryn anyqtady.
Zertteý nátıjeleri dúısenbi kúni Communications Earth & Environment jýrnalynda jarııalandy. Ǵalymdar SuperCam quralynyń kómegimen «Margin Unit» aýmaǵyndaǵy taý jynystarynyń 185-ten astam ýchaskesin zerttep, olardyń hımııalyq quramy men mıneralogııalyq erekshelikterin anyqtaǵan.
Sýmen baılanysty alǵashqy úderis kómirqyshqyl gazyna baı jerasty sýynyń olıvınmen árekettesýi kezinde bolǵan. Sonyń nátıjesinde taý jynystarynyń jaryqtary arqyly karbonat qabattary paıda bolǵan.
Ekinshi úderis bir kezderi Ezero kraterin alyp jatqan ejelgi kólmen baılanysty bolýy múmkin.
Al keıingi kezeńde quramynda kaltsıı sýlfaty men flıýorıt bar mıneraldy tamyrlar qalyptasqan. Flıýorıt bul turǵyda mańyzdy belgi sanalady, óıtkeni ol ádette janartaýlyq taý jynystary arqyly ystyq sý aınalǵan kezde túziledi. Bul keıinirek jerasty sýlarynyń qyzǵan kúıde qozǵalǵanyn kórsetedi.
Ǵalymdar bul jańalyqtyń mańyzy zor ekenin atap ótti. Ezero krateri Marstaǵy karbonat jynystarynyń eń iri taralǵan aýmaqtarynyń birinde ornalasqan. Karbonat pen kremnıı mıneraldary ejelgi qorshaǵan orta jaǵdaılary týraly aqparatty saqtaı alady. Sondyqtan olar Marsta ejelgi mıkrobtyq tirshiliktiń belgilerin izdeıtin ǵalymdar úshin erekshe qyzyǵýshylyq týdyrady.
Zertteýshiler sýmen baılanysty úderisterdiń qandaı retpen bolǵanyn anyqtaı alǵanymen, olardyń naqty qashan bolǵanyn ázirge aıta almaı otyr.
Perseverance marsohodynyń negizgi mindetteriniń biri – Marstyń geologııasy men ejelgi klımatyn zertteý, ejelgi mıkrobtyq tirshiliktiń belgilerin izdeý, sondaı-aq Mars betindegi taý jynystary men regolıt úlgilerin jınap, saqtaý.
Aıta keteıik, buǵan deıin NASA-nyń Lunar Reconnaissance Orbiter apparaty 2024 jylǵy 11 sáýir men 22 mamyr aralyǵynda Aıda bolǵan sırek soqtyǵysýdan Kún júıesinde jańadan paıda bolǵan eń iri kraterdiń qalyptasqanyn anyqtaǵan edi.
