Marrakeshte Qazaqstannyń Qurmetti konsýldyǵy ashyldy
ASTANA. KAZINFORM — Qazaqstannyń Marokkodaǵy elshisi Sáýlekúl Saılaýqyzy Marrakesh qalasynda Qazaqstan Respýblıkasy Qurmetti konsýldyǵynyń resmı ashylý rásimine qatysty, dep habarlaıdy QR Syrtqy ister mınıstrliginiń baspasóz qyzmeti.
Іs-sharaǵa Marrakesh qalasynyń jergilikti bılik ókilderi, Marokko Parlamentiniń depýtattary, halyqaralyq uıymdar, memlekettik organdar men ulttyq kompanııalardyń, sondaı-aq Qazaqstan men Marokkonyń saýda-ónerkásip palatalary jáne isker áıelder qaýymdastyqtarynyń ókilderi qatysty.
Qazaqstannyń Marokkodaǵy Elshisi Sáýlekúl Saılaýqyzy qurmetti konsýldar eki el arasyndaǵy baılanysty nyǵaıtýda mańyzdy ról atqaratynyn aıtty. Onyń sózinshe, jergilikti jaǵdaıdy jaqsy biletin qurmetti konsýldar saýda-ekonomıkalyq baılanystardy damytýǵa, týrısterge qoldaý kórsetýge jáne túrli máselelerdi jedel sheshýge yqpal etedi.
Elshi Marrakesh qalasynyń kezdeısoq tańdalmaǵanyn atap ótti. Óıtkeni bul qala Marokkonyń iri týrıstik ári iskerlik ortalyqtarynyń biri sanalady. Sondaı-aq ótken jyldan beri qoldanystaǵy vızasyz rejım eki el azamattarynyń ózara saparlarynyń kóbeıýine oń áser etkenin jetkizdi.
Marrakeshtegi Qazaqstannyń jańadan taǵaıyndalǵan Qurmetti konsýly ıÝsef Esası (ıÝ. Esası) kórsetilgen senim úshin alǵys aıtyp, Qazaqstan men Marokko arasyndaǵy saýda, ınvestıtsııa jáne iskerlik baılanystardy damytýǵa kúsh salatynyn málimdedi.
Marrakeshtegi Qurmetti konsýldyq — Qazaqstannyń Marokkodaǵy Kasablankadan keıin ashylǵan ekinshi konsýldyq mekemesi.
Buǵan deıin Kasablankada Qazaqstan–Marokko iskerlik keńesiniń alǵashqy otyrysy ótken bolatyn. Al Rabatta aýyl sharýashylyǵy, ónerkásip, saýda jáne ınvestıtsııa salalaryndaǵy yntymaqtastyqqa arnalǵan birqatar kezdesý uıymdastyryldy.
Osydan buryn Qazaqstannyń Konsýldyq jarǵysyna qandaı ózgertýler engizilgenin jazǵanbyz.
