Marokkodan Seýtaǵa ótpek bolǵan 67 mıgrant qaza tapty
ASTANA. KAZINFORM – Marokkodan Afrıkanyń soltústigindegi Ispanııanyń Seýta qalasyna zańsyz ótpek bolǵan mıgranttar arasynda qaza tapqandar sany 67 adamǵa jetti. Bul týraly Anadolý jazdy.
EFE agenttiginiń quqyq qorǵaý organdaryndaǵy derekkózderge silteme jasap habarlaýynsha, Seýtadan mıgranttardy Marokkoǵa qaıtarý jalǵasyp jatyr.
Sońǵy 30 saǵat ishinde shamamen 69,5 myń adam Marokko aýmaǵyna qaıtarylǵan. Sondaı-aq tún ishinde shekarany zańsyz kesip ótýge jańa áreketter tirkelmegeni habarlandy.
Ispanııa Іshki ister mınıstrliginiń málimetinshe, Marokkodan Ispanııaǵa ótpek bolǵan mıgranttar arasyndaǵy qaza tapqandar sany 67 adamǵa jetken.
Sonymen qatar Tarahal shekara ótkeli mańynda qorǵanys bógetin ornatý jumystary bastaldy.
El País gazetiniń jazýynsha, Ispanııa premer-mınıstri Pedro Sanches Eýropalyq komıssııa tóraǵasy Ýrsýla fon der Lıaıenge hat joldaǵan. Onda ol Seýtadaǵy oqıǵalardan keıin EO-nyń keıbir elderiniń ustanymyna kóńili tolmaıtynyn bildirip, odaqqa múshe memleketterdiń ishki ister mınıstrleriniń qatysýymen arnaıy kezdesý ótkizýdi usynǵan.
30 shildede 800-den astam zańsyz mıgrant Marokkonyń Fnıdek aýdanynan Afrıkanyń soltústik jaǵalaýyndaǵy Ispanııa anklavy – Seýtaǵa júzip ótpek bolǵan. Bul áreketti Ispanııa men Marokkonyń qaýipsizdik qyzmetteri toqtatty.
Premer-mınıstr Pedro Sanches jaǵdaıdy baqylaýǵa alý úshin úkimet barlyq qolda bar resýrsty jumyldyrǵanyn málimdedi. Zańsyz ótý áreketteri kóbeıgennen keıin Ispanııa bıligi óńirge qarýly kúshterdiń bólimshelerin jiberý týraly sheshim qabyldady.
Buǵan deıin Ispanııa úkimeti bir táýlik ishinde Seýtaǵa jaıaý nemese júzip 49 myńnan astam adamnyń jetýi múmkin ekenin habarlaǵan edi.
Eske sala ketsek, Seýta mańynda qaza tapqan 14 mıgranttyń máıiti Marokkodaǵy aýrýhanaǵa jetkizildi.
Oǵan deıin Ispanııa Marokkomen shekarada jańa bóget ornatýǵa kiriskenin jazdyq.
