Marokkodaǵy jastar narazylyǵy jappaı qaqtyǵysqa ulasty: qaza tapqandar bar
ASTANA. KAZINFORM - Soltústik Afrıkadaǵy jastardyń sherýi jappaı qaqtyǵysqa ulasyp, saldarynan adamdar qaza taýyp, júzdegen adam qamaýǵa alyndy, dep habarlaıdy Kazinform agenttiginiń menshikti tilshisi.
Resmı málimetke sáıkes, 1 qazan kúni Marokkonyń ońtústik-batysyndaǵy Agadır qalasynyń mańynda jandarmerııa qyzmetkerleri polıtsııa bólimshesine kirip, qarý-jaraqty tartyp almaq bolǵan bir top narazy topqa oq jaýdyrǵan.
Marokko Іshki ister mınıstrliginiń málimetinshe, saldarynan úsh adam qaza taýyp, ondaǵan adam jaralanǵan. Mınıstrlik qaqtyǵys bolǵan túnde barlyǵy 354 adam, onyń ishinde 326 qaýipsizdik qyzmetkeri jaralanǵanyn túsindirdi. Eldiń 23 aımaǵyndaǵy 271 qyzmettik polıtsııa kóligi, 175 jeke avtokólik, 80-ge jýyq ákimshilik jáne kommertsııalyq ǵımarat zaqymdanǵan.
Іshki ister mınıstrligi tártipsizdikke qatysqandardyń 70%-y kámelettik jasqa tolmaǵandar ekenin, al keı jaǵdaıda olardyń úlesi 100%-ǵa jetkenin málimdedi. Prokýratýranyń qaýlysymen kámeletke tolmaǵandar protsessýaldyq qadaǵalaýǵa alynsa, eresekterge qatysty qamaýǵa alý sharasy taǵaıyndaldy. Barlyǵy 400-den astam adam ustaldy.
Z býynynyń narazylyǵy
Marokko Koroldiginde quqyq qorǵaý organdarymen qaqtyǵysqa ulasqan narazylyq sharalary bir aptadan beri jalǵasyp jatyr. Narazylyq sharalary eldiń eń iri qalalarynda, sonyń ishinde Rabat, Kasablanka, Tanjer, Marrakesh jáne Agadırde ótip jatyr. Jastar kólikterdi órtep, bankterge, dúkenderge, úkimettik ǵımarattarǵa shabýyl jasap, polıtsııa beketterin qıratty.
#GENZ212 youth protests in Morocco grow in size and boldness. They demand health care and education, protest money spent in stadiums for the World Cup. "Al-shaʿb yurīd suqut al-fasād" - the people want the fall of corruption. pic.twitter.com/dyXy4Qg8kF
— Jorge Martin ☭ (@marxistJorge) September 29, 2025
Narazylyq tolqynyn TikTok, Instagram jáne Discord sııaqty áleýmettik medıa platformalarynda paıda bolǵan «GenZ 212» dep atalatyn anonımdi jastar toby uıymdastyrdy. Belsendilerdiń aıtýynsha, olardyń talaby densaýlyq saqtaý men bilim berý salasyndaǵy reformalarǵa, sondaı-aq jemqorlyqpen kúreske qatysty.
- Bizde stadıondar bar, aýrýhanalar qaıda? - deıdi demonstranttar 2026 jylǵy Afrıka kýbogy men 2030 jylǵy álem chempıonatyna daıyndyqqa mıllıardtaǵan qarajat salatyn bılikke narazylyq bildirip.
ІІM narazylyq bildirý quqyǵy zań aıasynda saqtalatynyn, alaıda quqyqtyq tártip kúshteri «azamattar men ınfraqurylym obektileriniń qaýipsizdigine tónetin qaterge jol bermeıtinin» atap ótti.
Sarapshylardyń pikirinshe, narazylyqqa densaýlyq saqtaý júıesiniń álsizdigi, jastar arasyndaǵy jumyssyzdyq (resmı derekter boıynsha 35%-ǵa deıin), áleýmettik teńsizdik jáne áleýmettik qyzmetterge ınvestıtsııa salýdyń ornyna sporttyq jobalarǵa qarjy jumsaýǵa kóńili tolmaý sııaqty faktorlar áser etken.
Tártipsizdiktiń eń kúshti epızodtary Sýss-Massa aımaǵynyń ortalyq qalasy Agadırde jáne onyń mańyndaǵy aýdandarda tirkeldi.
Aıta keteıik, Marokko Eýropalyq Odaqtaǵy eń iri tyńaıtqysh jetkizýshige aınaldy.