Marokkoda jer silkinisinen qaza tapqandar sany 3 myńǵa jýyqtady

RABAT. QazAqparat – Marokkodaǵy joıqyn zilzala saldarynan qaza tapqandar sany 2901-ge, zardap shekkender 5530-ǵa jetti. Koroldiktiń ishki ister mınıstrligi osyndaı derek keltirip otyr, dep habarlaıdy QazAqparat Anadoly agenttigine silteme jasap.

Euronews-tiń málimetinshe, tiri qalǵandardy tabýǵa úmit saǵat saıyn azaıyp barady. Tabıǵı apattan anaǵurlym kóp zardap shekken Marrakeshtiń ońtústigindegi Al-Haýz óńirinde qýatty jerasty dúmpýleri áli de sezilip jatyr. Sanıtarlyq jaǵdaı kúrdelene túsýde, ınfektsııalyq aýrýlardyń týyndaý qaýpi bar.

Sársenbiden bastap Joǵarǵy jáne Orta Atlas taýlary aýdandarynda jańbyr jaýatyny kútiledi. Bılik pen halyq budan jaǵdaı odan ári qıyndap, tiri qalǵandardy tabý múmkindigi azaıady dep úreılenip otyr.

Eske salaıyq, Marokkoda 7 ball qýatymen jer silkinisi 8 qyrkúıek kúni, jergilikti ýaqytpen saǵat 23:10-da bolǵan edi. Mert bolǵandar sany kún sanap artýda.

Marokkonyń Ulttyq geofızıka ınstıtýtynyń habarlaýynsha, jer silkinisiniń oshaǵy Marrakeshtegi Al-Haýz óńirinde ornalasty. Tereńdigi – 8 shaqyrym. Terbelister epıtsentrden 400 km radıýsta sezildi.

Qýatty dúmpýden keıin júzdegen aftershok tirkeldi, magnıtýdasy eń úlkeni – 6,0.

Marokko koroli Muhammed VI kóptegen adamnyń qazasyna baılanysty elde úshkúndik qaraly kún jarııalady.

Prezıdent Qasym-Jomart Toqaev Marokko Koroli VI Muhammedke kóńil aıtý jedelhatyn joldady.