Marokkoda taǵy bir altyn kenishi tabyldy

ASTANA. KAZINFORM — Marokkonyń Tıngır provıntsııasynan altyn qoryna baı jańa aýmaq tabyldy, dep jazady AZERTADJ.

Kanadalyq Aya Gold & Silver kompanııasy Marokkonyń shyǵysyndaǵy Tıngır provıntsııasynda, Býmeden jobasynyń negizgi beldeýinen batysqa qaraı ornalasqan Assıram ýchaskesinde quramynda altyny mol jańa ken ornyn tapqanyn habarlady.

Agenttiktiń habarlaýynsha, kompanııa júrgizgen burǵylaý jumystarynyń nátıjeleri bul aımaqta bolashaǵy zor qorlar bar ekenin kórsetken.

Resmı málimdemede kompanııa jaqynda júrgizilgen burǵylaý jumystary nátıjesinde uzyndyǵy segiz kılometrden asatyn altynǵa baı mıneraldaný aımaǵy anyqtalǵanyn rastady.

Jer betinen alynǵan synamalarda bir tonna topyraqtan 12,2 gramm altyn jáne 4,1% mys tabylǵan.

Bul kórsetkishter «sapalyq serpilis» retinde sıpattalyp, óńirde bolashaqtaǵy geologııalyq barlaý jumystary úshin jańa múmkindikter ashyp otyr, dep jazady marokkolyq Akhbarona elektrondy gazeti.

Osyǵan deıin Marokko – Afrıkada kún energetıkasyn damytý salasynda kósh bastaǵanyn jazǵanbyz.

Sonymen qatar Marokko alǵashqy «shybyn fabrıkasyn» ashqany belgili boldy.