Marokkoda mıgranttardyń Seýtaǵa zańsyz kirý isine qatysty 25 adam sotqa tartyldy

Marokkolyq Hespress portalynyń málimetinshe, olarǵa shekarany zańsyz kesip ótýdi uıymdastyrý, lıtsenzııasyz jolaýshy tasymaldaý, júzý quraldaryn shamadan tys júkteý, vızasynyń merzimi aıaqtalǵannan keıin elde zańsyz bolý, quqyq qorǵaý organdary qyzmetkerlerin qorlaý jáne olarǵa shabýyl jasaý, polıtsııa talabyna baǵynbaý, sondaı-aq qoǵamdyq múlik pen ınfraqurylym nysandaryn qasaqana búldirý baptary boıynsha aıyp taǵylǵan.

Dúısenbi kúni Marokko úkimeti jappaı shekara buzý oqıǵasy kezinde qandaı da bir «qysymǵa nemese bopsalaýǵa» kóndi degen málimdemelerdi joqqa shyǵardy. Sonymen qatar Rabat birqatar eýropalyq saıasatkerlerdi kóshi-qon daǵdarysyn saılaýaldy maqsatta paıdalanýǵa tyrysty dep aıyptap, olardyń ustanymyna kóńili tolmaıtynyn bildirdi.

Marokkonyń ıspandyq BAQ-qa pikir bildirgen dıplomatııalyq derekkózderi eldiń kóshi-qon saıasatyna qatysty «bosańdyq boldy» degen málimdemelerdi de úzildi-kesildi joqqa shyǵardy. Olardyń aıtýynsha, shekarany zańsyz kesip ótýge áreket jasaǵan kez kelgen adam keri qaıtarylady jáne Marokko ony qabyldaıdy. Rabat bul mindettemeni kóp jyldan beri oryndap kele jatqanyn atap ótti.

Sonymen qatar Marokkonyń Adam quqyqtary qaýymdastyǵy (AMDH) Nador qalasynda jaqynda bolǵan kóshi-qon daǵdarysyna qatysy bar degen kúdikpen taǵy 52 adamnyń jaýapqa tartylǵanyn habarlady.

Uıymnyń málimetinshe, olardyń 11-i Nador qalasynyń apellıatsııalyq sotynyń qylmystyq ister jónindegi palatasyna jetkizilse, taǵy 41 adam birinshi satydaǵy sottyń qaraýyna berilgen. Barlyǵy sotqa deıin qamaýda otyr. Keıbirine qylmystyq baptar boıynsha aıyp taǵylǵanymen, AMDH naqty qandaı baptar ekenin jarııalaǵan joq.

Eske sala ketsek, Marokkodan Seýtaǵa ótpek bolǵan 67 mıgrant qaza tapqan edi.

Jaqynda Ispanııa Seýtadaǵy mıgratsııalyq daǵdarys qurbandary týraly jańa málimet jarııalady.