Marokkoda Ókilder palatasyna saılaý ótti

Sársenbi kúni Marokkoda parlamenttiń tómengi palatasy — 395 depýtattyq orynnan turatyn Ókilder palatasyna saılaý ótti. Daýys berý aıaqtalǵannan keıin saılaý komıssııalary bıýlletenderdi sanaýǵa kiristi. Onyń qorytyndysy beısenbi, 24 qyrkúıekte jarııalanady, dep habarlaıdy Anadolu agenttigi.

Associated Press agenttiginiń málimetinshe, bul joly saılaýshylardyń 38%-y daýys berýge qatysqan. Al 2021 jylǵy qyrkúıekte ótken parlament saılaýynda azamattardyń 50,18%-y óz tańdaýyn jasaǵan edi.

Bıyl daýys berý quqyǵyna ıe azamattardyń sany 15,8 mıllıonnan asty. Depýtattyq mandat úshin 7 288 kandıdat baq synady, olardyń 2 658-i — áıelder. Saılaý barysyn 3 206 baqylaýshy qadaǵalady. Olardyń qatarynda 200 sheteldik ókil boldy.

Parlamentte kópshilik daýysqa ıe bolý úshin keminde 198 mandat qajet. Qazirgi boljam boıynsha, birde-bir partııa mundaı basymdyqqa jeke ózi qol jetkize almaıdy. Sol sebepti saılaýda basym túsken saıası kúsh úkimetti jasaqtaý úshin basqa partııalarmen birigip, koalıtsııa qurýy múmkin.

Marokko Konstıtýtsııasyna sáıkes, korol Ókilder palatasynda eń kóp mandatqa ıe bolǵan partııanyń ókilin úkimet basshysy etip taǵaıyndaıdy. Al mınıstrler quramyn premer-mınıstrdiń usynysy negizinde monarh bekitedi.

2021 jylǵy saılaýda táýelsizderdiń ulttyq birlestigi 102 mandatpen birinshi orynǵa ıe boldy. Partııa Aýtentıkalyq jáne zamanaýı partııamen jáne «Táýelsizdik» (Istıklıal) partııasymen birge Azız Ahnýsh bastaǵan úkimetti qurdy.

Jańa úkimet 2030 jylǵy fýtboldan álem chempıonatyna daıyndyqqa baǵyttalǵan mıllıardtaǵan ınvestıtsııanyń ıgerilýine jaýap beredi. Buǵan qosa, bılik halyqty alańdatqan jumys oryndaryn kóbeıtý, tabysty arttyrý, bilim berý men densaýlyq saqtaý salalarynyń jumysyn jaqsartý jáne turǵyn úı máselesin sheshýge tıis.

Bul — shamamen bir jyl buryn áleýmettik-ekonomıkalyq máseleler aıasynda ótken jastar narazylyǵynan keıingi alǵashqy saılaý. Daýys berý Marokkonyń soltústigindegi shekara arqyly Ispanııanyń Seýta anklavyna ótpek bolǵan mıgranttardyń jappaı áreketinen keıin uıymdastyryldy. Shekarany kesip ótýge umtylǵandar men qaýipsizdik kúshteri arasyndaǵy qaqtyǵys saldarynan ondaǵan adam qaza tapqan edi.

Sársenbiden beısenbige qaraǵan túni Marokkonyń MAP agenttigi Іshki ister mınıstri Abdelafı Laftıtke silteme jasap, saılaýdyń qorytyndysyn jarııalady. Saılaý nátıjesinde «Aýtentıkalyq jáne zamanaýı» partııasy 97 mandatpen kósh bastady. 

Al Jazeera telearnasynyń Marokko Іshki ister mınıstrligine silteme jasap habarlaýynsha, aldyn ala málimet boıynsha Ulttyq táýelsizder birlestigi 66 mandatqa ıe boldy. «Táýelsizdik» (Istıklıal) partııasy 65, al Ádilet jáne damý partııasy 54 oryn aldy.

Buǵan deıin Marokkoda mıgranttardyń Seýtaǵa jappaı ótý áreketi toqtatylǵanyn habarlaǵan bolatynbyz.