Marokkoda Qazaqstannyń Qurmetti konsýldyǵy ashyldy
ASTANA. QazAqparat - QR Syrtqy ister mınıstriniń orynbasary Asqar Mýsınovtyń jumys sapary aıasynda Marokkoda Kasablanka qalasyndaǵy Qazaqstan Respýblıkasynyń Qurmetti konsýldyǵynyń ashylý saltanaty ótti.
QR SІM baspasóz qyzmetinen habarlaǵandaı, A. Mýsınov qazaqstandyq-marokkolyq qarym-qatynas tarıhyndaǵy bul oqıǵanyń mańyzy men Qazaqstannyń aldaǵy ýaqytta yntymaqtastyqty damytýǵa múddeli ekenin atap ótti. Ol qurmetti konsýldyqtyń qyzmeti eki memleket arasyndaǵy saýda-ekonomıkalyq jáne mádenı-gýmanıtarlyq baılanystyń keńeıýine yqpaldasatynyna senim bildirdi.
Shara barysynda konsýldyqta kitap jáne foto kórmesi uıymdastyryldy.
QR Qurmetti konsýly laýazymyna Kasablankanyń bedeldi tulǵalarynyń biri - Arab Magrıbiniń Ekonomıkalyq palatasynyń prezıdenti, Marokko Parlamentiniń keńesshiler Palatasynyń eks-depýtaty Hassan Berkanı taǵaıyndaldy.
