Marokko zamanaýı bronetehnıka óndirisine daıyndalyp jatyr

ASTANA. KAZINFORM — Marokkoda zamanaýı jerústi áskerı brondalǵan WhAP 8x8 tehnıkalaryn jergilikti deńgeıde shyǵaratyn aýqymdy áskerı-ónerkásiptik jobany iske qosýǵa daıyndyq jumystary bastaldy, dep jazady AZERTADJ.

Marokkolyq Akhbarona basylymy habarlaǵandaı, joba Berreshıd mýnıtsıpalıtetinde qurylatyn «TATA Advanced Systems Maroc (TASM)» ónerkásiptik kásipornynyń aýmaǵynda júzege asyrylady.

Aýqymdy ári ambıtsııaly áskerı joba aıasynda barlyǵy 400 WhAP 8x8 brondalǵan mashına shyǵarý kózdelgen. Onyń ishinde 150-i Marokkonyń Koroldik qarýly kúshterine ártúrli jaýyngerlik konfıgýratsııalar men mindetterge beıimdelgen túrde jetkizilmek.

Zaýyttaǵy óndiristik ıntegratsııa deńgeıi bastapqy kezeńde 35% bolady, keıin bul kórsetkish 50%-ǵa deıin artady dep josparlanǵan. Qurylysty 36 aıdyń ishinde aıaqtaý kózdelip otyr. Kásiporyn jylyna 100 brondalǵan tehnıka óndire alady jáne shamamen 90 tikeleı jáne 250 janama jumys ornyn ashady. Akhbarona basylymy bul jobany eldiń áskerı óndiris salasyndaǵy sapaly serpilis dep baǵalaıdy.

Joba Marokko úshin qorǵanys ónerkásibinde jańa strategııalyq múmkindikter ashyp, eldiń aımaqtaǵy bedelin arttyrady. Sondaı-aq bul bastama tehnologııalyq jáne áskerı turǵydan táýelsizdikke umtylatyn Marokkony bolashaq qaýipterge tótep berýge daıyndaıdy.

Budan buryn habarlanǵandaı, 2025 jyldyń mamyryna deıin Marokko 7,2 mıllıon týrıst qabyldap, ótken jyldyń osy kezeńimen salystyrǵanda kórsetkishti 22 paıyzǵa arttyrdy.