Marokko koroli Qurban aıtta qoı soıýdy toqtatýǵa shaqyrdy

ASTANA. KAZINFORM – Marokko koroli VI Muhammed qýańshylyqtan keıin elde maldyń azaıýyna baılanysty marokkolyqtardy bıylǵy Qurban aıtta qoı shalý rásiminen bas tartýǵa shaqyrdy, dep habarlaıdy CNN. 

Resmı derekterge sáıkes, Marokkoda 2025 jylǵa qaraı iri qara men qoı sany úzdiksiz qurǵaqshylyq saldarynan toǵyz jyl burynǵy sońǵy sanaqpen salystyrǵanda 38 paıyzǵa qysqardy.

— Bizdiń osy dinı rásimdi eń jaqsy jaǵdaıda oryndaýǵa degen umtylysymyz mal basynyń aıtarlyqtaı qysqarýyna ákelgen elimizdiń aldynda turǵan klımattyq jáne ekonomıkalyq qıyndyqtardy eskerý jaýapkershiligimen birge júredi, - delingen koroldiń hatynda. Ony Al Oula memlekettik telearnasynda Din isteri jónindegi mınıstr Ahmed Taofık oqydy.

Marokkonyń joǵarǵy dinı jetekshisi korol «osyndaı qıyn jaǵdaıda qurbandyq shalý halqymyzdyń úlken bóligine, ásirese tabysy shekteýli adamdarǵa aıtarlyqtaı zııan tıgizetinin» atap ótti. 

Bıyl jaýyn-shashyn 30 jyldyq ortasha deńgeıden 53%-ǵa tómen boldy, sonyń saldarynan malǵa jaıylym jetispedi. Et óndirisi qysqardy, bul ishki naryqta baǵalardyń kóterilýine jáne iri qara, qoı jáne qyzyl et ımportynyń artýyna ákeldi.

— Jaqynda el Aýstralııadan 100 myńǵa deıin qoı ákelý týraly kelisimge qol qoıdy, - dep jazdy CNN.

Marokko óziniń 2025 jylǵy bıýdjetinde ishki naryqtaǵy baǵalardy turaqtandyrý úshin iri qara mal, qoı, túıe jáne qyzyl etke ımporttyq baj salyǵyn jáne qosylǵan qun salyǵyn toqtatty.

Eske sala ketsek, Qazaqstan musylmandary dinı basqarmasynyń sharıǵat jáne pátýa bólimi 2025 jylǵy dinı kúnder kestesin bekitti.