Marokko koroli Qurban aıtqa oraı 1500-den asa adamǵa raqymshylyq jasady

ASTANA. KAZINFORM — Marokko Koroli Muhammed VI Qurban aıt merekesine oraı 1526 tutqynǵa raqymshylyq jasady, dep habarlaıdy Anadoly.

Marokko Ádilet mınıstrliginiń málimetinshe, olardyń ishinde 1305 adam jazasyn túrmede ótep jatqan bolatyn.

Raqymshylyq ártúrli sot ınstantsııalary arqyly sottalǵan azamattarǵa qatysty qoldanyldy.

Sonymen qatar, ulttyq qundylyqtarǵa adaldyǵyn bildirip, ekstremızm men terrorızmnen bas tartqandar qataryndaǵy 15 sottalǵan azamat ta keshirim aldy.

Marokkoda dinı merekeler qarsańynda amnıstııa jarııalaý dástúrge aınalǵan. Bul sharalar koroldiń konstıtýtsııalyq ókilettigi aıasynda júzege asyrylady jáne qoǵamdyq beıbitshilikti nyǵaıtý men sottalǵandardy qoǵamǵa qaıta beıimdeýdi maqsat etedi.

Buǵan deıin Qurban aıttyń alǵashqy kúninde Túrkııada qurbandyq shalý kezinde jaraqat alǵan 14 myńnan asa adamǵa medıtsınalyq kómek kórsetilgenin jazdyq.