Marokko IYU-nyń Astana sammıtine qatysatyn boldy
Sapar barysynda Arnaıy ýákil Marokkonyń Syrtqy ister mınıstri Naser Býrıtamen kezdesip, onymen saıası, ekonomıkalyq, ınvestıtsııa jáne mádenı salalardaǵy ekijaqty yntymaqtastyqty belsendirý joldaryn, sondaı-aq halyqaralyq uıymdar sheńberinde eki el arasyndaǵy ózara is-qımyldyń keleshegin talqylady.
A. Kamaldınov Marokkonyń Qazaqstannyń syrtqy saıası bastamalaryna árdaıym qoldaý kórsetip otyrǵany úshin alǵys bildirdi. Ol Koroldiktiń basty halyqaralyq musylman qurylymy bolyp esepteletin Islam yntymaqtastyǵy uıymyn qurýshy memleket retindegi basty rólin atap ótip, 2017 jylǵy 10-11 qyrkúıekte Astana qalasynda ótetin IYU-nyń ǵylym jáne tehnologııalar boıynsha birinshi sammıtine Marokko Koroli Mýhammad VI qatysýynyń mańyzdy ekendigi týraly Qazaqstan Prezıdenti Nursultan Nazarbaevtiń joldaýyn tapsyrdy.
N. Býrıta Koroldiń Qazaqstan Prezıdentiniń bul bastamasyn joǵary baǵalaıtynyn jáne aldaǵy ótetin sammıtke basa mán beretinin atap ótti. Sonymen qatar marokkolyq mınıstr ǵylym men tehnologııany damytýǵa arnalǵan osy musylman lıderleriniń birinshi kezdesýin ótkizý ıdeıasynyń marokkolyq monarhtyń IYU qyzmeti aıasyn keńeıtýge qatysty oıymen sáıkes keletinin jetkizdi. Osy oraıda, syrtqy saıası vedomstvonyń basshysy Marokkonyń IYU Astana sammıtine eń joǵary deńgeıde qatysatyndyǵyn qýattady.
A. Kamaldınov Marokkonyń balamaly energetıkany damytý salasyndaǵy qyzmetin joǵary baǵalap, eldiń ońtústiginde ornalasqan aımaqtaǵy eń úlken «Nur» kún elektr stantsııasynyń jaqyn arada iske qosylýymen quttyqtady. Osy rette, Arnaıy ýákil marokkolyq mamandandyrylǵan kompanııalardy Astanada ótetin «EKSPO-2017» halyqaralyq kórmesine belsendi túrde qatysýǵa shaqyrdy.
Suhbat barysynda taraptar halyqaralyq jáne aımaqtyq problemalar boıynsha ustanymdarymen bólisti. Marokkolyq mınıstr Qazaqstannyń BUU QK turaqty emes múshesi retindegi qyzmetine jáne Sırııa boıynsha kelissózderdiń Astana protsesine joǵary baǵa berdi.
A. Kamaldınov óziniń jumys sapary baǵdarlamasynyń sheńberinde Maǵrıb elderi saýda-ónerkásiptik palatasy odaǵynyń basshylyǵymen jáne birqatar marokkolyq kásipkerlermen kezdesip, olarmen saýda-ekonomıkalyq yntymaqtastyqty keńeıtýdiń keleshegin talqylady. Buǵan qosa ol Koroldiktegi Qazaqstannyń Qurmetti konsýldyǵynyń ǵımaratyna baryp, sol eldiń ortalyq telekanaly men birqatar BAQ baspasóz betterine suhbat berdi.
