Marokko fýtbol quramasy 20 jyldan soń Álem chempıonatyna oraldy
ASTANA. QazAqparat - Marokko ulttyq qurama komandasy Álem chempıonatyna irikteý týrnırinde 0:2 esebimen Kot-d'Ivýardy jeńip, 2018 jyly Reseıde ótetin mýndıalǵa joldama aldy, dep habarlaıdy TASS.
Goldardy Nabıl Dırar (25-mınýt) pen Mehdı Benatıa (30-mınýt) soqty. S tobynda 12 upaı jınaǵan Marokko birinshi oryndy, ekinshi oryndy 8 upaımen Kot-d'Ivýar (8) alsa, Gabon (6) men Malı (4) úshinshi-tórtinshi oryndarmen shekteldi.
Marokko quramasy mýndıalǵa sońǵy ret 1998 jyly Frantsııada qatysqan bolatyn. Sol kezde soltústik-batys afrıkalyqtar toptan shyǵa almaǵan. Jalpy tarıhynda tórt ret álem chempıonatyna barǵan Marokko debıýtin 1970 jyly toılap, bir ret pleı-offqa shyqqan: 1986 jyly Meksıkadaǵy mýndıaldyń 1/8 fınalynda GFR quramasynan jeńilip qalady. Marokkonyń iri jeńisteri de sol kezeńge týra keledi, 1976 jyly Afrıka ulttary kýbogynda jeńimpaz atandy.
Marokkolyqtar 2018 jylǵy Álem chempıonatyna Reseı, Brazılııa, Iran, Japonııa, Meksıka, Belgııa, Ońtústik Koreıa, Saýd Arabııasy, Germanııa, Anglııa, Ispanııa, Nıgerııa, Kosta-Rıka, Polsha, Egıpet, Islandııa, Serbııa, Frantsııa, Portýgalııa, Panama, Ýrýgvaı, Kolýmbııa, Argentına jáne Senegal quramalarynan keıin joldama alǵan 25-komanda, Marokkomen bir ýaqytta Lıvııamen teń túsip, jalpy 14 upaımen A tobynda birinshi oryndy ıelengen Týnıs quramasy 26-komanda boldy.
