Marokko Eýropalyq Odaqtaǵy eń iri tyńaıtqysh jetkizýshige aınaldy

ASTANA. KAZINFORM — Marokko Eýropalyq Odaqqa 103 mln eýro kóleminde tyńaıtqysh eksporttap, eń iri jetkizýshi atandy, dep habarlaıdy AZERTADJ.

Bul kórsetkish boıynsha Reseıden ozyp tústi. Reseı jańa kedendik sharalarǵa baılanysty tórtinshi orynǵa tómendedi.

AZERTADJ-tyń habarlaýynsha, Eýrostat derekteri boıynsha, ekinshi orynda – 51,3 mln eýro kóleminde eksport jasaǵan Mysyr, úshinshi orynda – 50 mln eýromen Aljır tur. Odan keıin Túrkııa (31,5 mln eýro) keledi. Buǵan deıin Eýropaǵa tyńaıtqyshtyń negizgi jetkizýshisi bolǵan Reseı tek 43,1 mln eýroǵa tyńaıtqysh eksporttaǵan.

Aıta keteıik, 1 shildeden bastap Eýropalyq odaq tyńaıtqysh ımportyna qosymsha baj salyǵyn engizdi: azotty tyńaıtqyshtar úshin tonnasyna 40 eýro, keshendi tyńaıtqyshtar úshin tonnasyna 45 eýro, oǵan qosa bastapqy 6,5% kedendik alym saqtaldy. Bul baj salyǵy 2028 jylǵa deıin kezeń-kezeńimen ósip, sáıkesinshe 315 jáne 430 eýroǵa jetedi dep kútilýde.

Aıta ketelik Pákistan Qazaqstanda tyńaıtqysh óndirýge nıetti.