Marokko altynshy márte fýtboldan 2030 jylǵy álem chempıonatyn ótkizýge usynys bildirdi
Bul - Marokkonyń fýtboldan álem chempıonatyn ótkizýge jasaǵan altynshy usynysy. Soltústik Afrıka memleketi 1994 jyldan beri dúbirli dodany uıymdastyrýǵa nıet bildirgen elderdiń qatarynda sanalyp keledi.
Marokko tórt jyl buryn 2030 jylǵy álem chempıonatyn ótkizýge usynys jasaıtynyn jarııalaǵan edi. Sol joly olar 2026 jylǵy dop dodasyn ótkizýge daýys berýde jeńilip qaldy. Atalǵan ýaqytta marokkolyqtar barlyq ınfraqurylymdy jaqsartý úshin 16 mlrd AQSh dollaryn bólýge qarjy taba almady. Endi Ispanııa jáne Portýgalııamen birlesken ótinimde oǵan az qarjy jumsaıdy.
Marokkolyqtar budan buryn dúbirli dodany ótkizýge baılanysty Pıreneı túbegindegi eldermen kelissóz júrgizgeni jóninde áńgime taraǵan edi. Degenmen buǵan baılanysty resmı túrde ótinim berile qoıǵan jooq.
2022 jylǵy álem birinshiliginde marokkolyq fýtbolshylar joǵary nátıjege qol jetkizdi. Sondyqtan olar dúbirli dodany ótkizýge baılanysty ótinish qoldaý tabady degen úmittenip otyr.
Aıta ketsek, Ispanııa, Portýgalııa jáne Marokkonyń ótinimi erekshe qarsylyqqa tap bolýy yqtımal. Óıtkeni, álem chempıonatynyń alǵash ótkizilýine 100 jyl tolýyna oraı Argentına, Chılı, Paragvaı jáne Ýrýgvaı birlesken ótinim berdi.
Sondaı-aq, Saýd Arabııasy, Egıpet jáne Grekııa birlesken ótinim berýge nıet tanytyp otyr. Derek kózine súıensek, Saýd Arabııasy óz qarjysy esebinen Grekııa men Egıpette stadıondar salýǵa yntaly. Esesine dop dodasynyń tórtten úsh bóligin ózinde ótkizýge múmkindik alady.
2030 jylǵy álem chempıonatyn ótkizetin memleketter 2024 jyly FIFA-nyń 211 uıym múshesiniń qatysýymen ótetin 74-shi kongresinde anyqtalady.
Eske salsaq, budan buryn Chempıondar lıgasynda «Manchester Sıtı» shabýylshysy Erlıng Holand bir oıynda bes gol soqty.
