Marokko Afrıkadaǵy jahandyq logıstıkalyq ortalyqqa aınaldy

ASTANA. KAZINFORM — Tanjer-Med portynyń arqasynda Marokko Afrıka men Eýropa men Amerıka arasyn baılanystyratyn mańyzdy logıstıkalyq torapqa aınaldy. Bul port qazirgi ýaqytta Ispanııanyń Alhesıras jáne Barselona, Italııanyń Genýıa qalalarymen teńiz baǵyttary boıynsha jumys isteıdi, dep jazdy Azertadj.

Azertadj marokkolyq Akhbarona elektrondy gazetine silteme jasap habarlaǵandaı, Qytaı Chendý qalasynan Tanjer-Med portyna deıin Polsha, Germanııa jáne Ispanııa arqyly ótetin jańa logıstıkalyq dálizdi iske qosty. Qurlyq (temirjol) jáne teńiz tasymalyn biriktiretin bul dáliz jetkizý ýaqytyn 35 kúnnen 20 kúnge deıin qysqartty. Bul Marokkony Afrıka men Amerıkaǵa aparatyn strategııalyq qaqpa retinde erekshe deńgeıge kóterip otyr.

Bul joba «Jańa Jibek joly» bastamasy aıasynda júzege asyrylyp jatyr. Júk aldymen Eýropa arqyly temirjolmen Barselonaǵa jetkizilip, sodan keıin Tanjer-Med portynda kemelerge tıep jóneltiledi. Bul tásil shyǵyndardy azaıtyp, jetkizý senimdiligin arttyrady jáne Soltústik Afrıka naryqtaryna taýarlardyń kelýin jedeldetedi.

Bul bastama marokkolyq eksporttaýshylar úshin úlken múmkindikter ashady, ásirese Qytaıdyń Marokkony qosa alǵanda 53 afrıkalyq elge kedendik jeńildikter usyný saıasaty aıasynda. Marokkolyq kásipkerlerge 1,4 mıllıard tutynýshysy bar jáne jylyna 186 mıllıard dollarlyq azyq-túlik ımporttaıtyn Qytaı naryǵyna shyǵýǵa úlken múmkindik berilip otyr.

Sonymen qatar, sońǵy 15 jyl ishinde Afrıkadaǵy eń iri avtomobıl óndirýshisine aınalǵan Marokko óz pozıtsııasyn jahandyq logıstıkalyq ınfraqurylym retinde kúsheıtip keledi. Buǵan Eýropaǵa geografııalyq jaqyndyq jáne Amerıkaǵa teńiz arqyly nebári bes kúndik jol áser etýde. «Atlant jaǵalaýy» jobasy, sonyń ishinde Dahla porty, Marokkonyń Qytaı, Afrıka jáne Eýropa arasyndaǵy kópirge aınalý jolynda senimdi ilgerilep kele jatqanyn kórsetedi.

Buǵan deıin Marokko Afrıkada kún energetıkasyn damytý salasynda kósh bastaǵanyn jazǵan edik.