Marokko 2030 jylǵa qaraı 26 mln týrıst qabyldaýdy josparlap otyr

ASTANA. KAZINFORM — 2025 jyly Marokkoǵa rekordtyq 19,8 mıllıon týrıst kelgen, bul 2024 jylmen salystyrǵanda 14 paıyzǵa kóp, dep habarlaıdy AZERTADJ.

Bul týraly Marokkonyń Týrızm, qolóner, áleýmettik ekonomıka jáne yntymaqtastyq mınıstrliginiń málimdemesinde aıtylǵan.

Mınıstrliktiń derekterine sáıkes, Patshalyq alǵash ret 20 mıllıon týrıst mejesine jaqyndap otyr. Bul týrızm salasyndaǵy turaqty ósim úrdisin rastap, sektor damýynyń jańa kezeńin bildiredi.

Atalǵan rekordtyq kórsetkishter 2023–2026 jyldarǵa arnalǵan týrızmdi damytý jol kartasynyń tabysty júzege asyrylýynyń naqty nátıjelerin kórsetedi.

Bul baǵdarlama áýe qatynasyn nyǵaıtýǵa, qonaqúı sektoryn qurylymdaýǵa, týrıstik usynystardy ártaraptandyrýǵa, qyzmet kórsetý sapasyn arttyrýǵa, sondaı-aq ınfraqurylymdy damytýǵa baǵyttalǵan.

Bul ósim dınamıkasy 2025 jyldyń qarasha aıynyń sońyna qaraı týrızmnen túsken rekordtyq tabyspen qatar júrdi. Týrızmnen túsken kiris 124 mıllıard dırham (13 mlrd AQSh dollary) , 2024 jylmen salystyrǵanda 19 paıyzǵa artqan.

Marokko 2030 jylǵa qaraı 26 mıllıon týrıst qabyldaýdy jáne eldi úlgili týrıstik baǵytqa aınaldyrýdy maqsat etip otyr.

Aıta ketelik Marokkodaǵy sý tasqynynan qaza tapqandar sany 41 adamǵa jetti.