Marqum bolǵan depýtat S.Jylqaıdarovtyń ókilettigi toqtatyldy - Májilis
ASTANA. QazAqparat - Búgin Májiliste palata depýtattary qaıtys bolýyna baılanysty Sáken Jylqaıdarovtyń depýtattyq ókilettigin merziminen buryn toqtatý týraly sheshim qabyldady.
Eske sala keteıik, qazannyń 13-inde depýtat Sáken Jylqaıdarov dúnıeden ozǵan edi. Osyǵan baılanysty depýtattyq ókilettikti toqtatý týraly usynymdy qaraýdy QR Ortalyq saılaý komıssııasy engizgen bolatyn. Sáken Eginbaıuly Jylqaıdarov 1956 jyly Almaty oblysy Kóksý aýdanynda dúnıege kelgen. Qazaq polıtehnıkalyq ınstıtýtyn jáne Almaty joǵary partııa mektebin bitirgen. 1993-1996 jyldary Almaty qalasy Medeý aýdany ákiminiń orynbasary, 1997-1999 jyldary Almaty oblysy Taldyqorǵan qalasy ákiminiń birinshi orynbasary bolyp qyzmet etti. 1999-2011 jyldary Almaty oblysy Taldyqorǵan qalasynyń ákimi, 2011-2012 jyldary Almaty oblysy ákiminiń orynbasary laýazymdaryn atqarǵan. 2012 jylǵy qańtardan bastap V saılanǵan Parlament Májilisiniń depýtaty. «Nur Otan» Halyqtyq Demokratııalyq partııasynyń múshesi, partııalyq tizim boıynsha saılanǵan. Májilistiń Qarjy jáne bıýdjet komıtetiniń múshesi boldy. «Qurmet» ordenimen, «Qazaqstan Respýblıkasynyń Táýelsizdigine 10 jyl», «Astananyń 10 jyldyǵy», «Tyń ıgerýge 50 jyl», «Qazaqstan Respýblıkasynyń Konstıtýtsııasyna 10 jyl», «Qazaqstan Respýblıkasynyń Táýelsizdigine 20 jyl» medaldarymen marapattalǵan.
