«Marko Polonyń Jibek joly» fılmi Mılanda kórsetiledi
ASTANA. QazAqparat - 19-26 naýryz kúnderi Mılan qalasynda Afrıka, Azııa, Latyn Amerıkasy fılmderiniń 27-shi festıvali ótedi, dep habarlady QR Mádenıet jáne sport mınıstrligi Qazaq ǵylymı-zertteý mádenıet ınstıtýty.
Festıval Italııa kınoındýstrııasyndaǵy úsh qurlyqtyń mádenıetin elý jyldan beri jalǵap turǵan biregeı jáne jalǵyz shara. Atalǵan festıval barysynda «Lı jáne aqyn», «Qarsy bettegi úı», «Oktıabr» jáne ózge de týyndylar keń tanymaldylyqqa ıe boldy. Bıylǵy kınofestıval baǵdarlamasyna 60-qa jýyq fılm engen.
«Marko Polonyń Jibek joly» atty qazaqstandyq ǵylymı-kópshilik fılm 23 naýryz kúni 18:00-de Spatsıo Oberdan kınoteatrynda ıtalııalyq kórermender nazaryna usynylady.
Fılmdi 2016 jyly QR Mádenıet jáne sport mınıstrliginiń tapsyrysyna oraı, Qazaq ǵylymı-zertteý mádenıet ınstıtýty ıtalııalyq jáne qytaılyq áriptesterimen birlesip túsirdi. Amerıkalyq tanymal dokýmentalıst Marıo Dıýkordeı fılmniń teń prodıýseri atandy. 2017 jyly Qytaıda, AQSh-ta jáne Eýropada fılm kórsetilimin uıymdastyrý josparlanǵan.
«Marko Polonyń Jibek joly» ǵylymı-kópshilik fılmi ıtalııalyq tanymal kópes Marko Polonyń Uly dala boıyndaǵy saıahattary týraly kitabynyń jelisi boıynsha túsirildi. Kartınada negizinen Ortalyq Azııa men búgingi Qazaqstan aımaǵyn sıpattaýǵa aıryqsha mańyz beriledi. Rejısserdiń oıy ǵylymı suhbat, tarıhı rekonstrýktsııa men etnografııalyq fılm úılesimi negizinde qurylǵan. Jetekshi qazaqstandyq jáne sheteldik tarıhshy-sarapshylar Qazaq ǵylymı-zertteý mádenıet ınstıtýtymen qazaq tiline alǵash ret aýdarylǵan Marko Polonyń «Álemniń áralýandyǵy» atty kitabynyń biregeıligi týraly baıandaıdy.
Eske sala ketsek, 27 jeltoqsan kúni elordada QR Mádenıet jáne sport mınıstri Arystanbek Muhamedıulynyń qatysýymen «Marko Polonyń Jibek joly» atty ǵylymı-kópshilik fılminiń premeralyq kórsetilimi ótti.
