Marko Polo týraly qazaqstandyq fılm Mılanda arnaıy júlde aldy
ASTANA. QazAqparat - Mılan qalasynda Afrıka, Azııa jáne Latyn Amerıkasy fılmderiniń 27-festıvali óz máresine jetti. Naýryzdyń 19-y men 26-sy aralyǵynda ótken Italııa kınoındýstrııasyndaǵy biregeı jáne dara festıval jarty ǵasyr boıyna úsh qurlyqtyń mádenıetin baılanystyryp keledi.
23 naýryzda Spatsıo Oberdan kınoteatrynda qazaqstandyq «Marko Polonyń Jibek joly» ǵylymı-kópshilik fılm ıtalıandyq kórermenge usynyldy. Bul jaıynda QR Mádenıet jáne sport mınıstrligi Qazaq ǵylymı-zertteý mádenıet ınstıtýtynan málim etti, dep habarlaıdy QazAqparat.
Fılmniń kórsetilimine Qazaqstannyń Italııadaǵy Elshiliginiń birinshi hatshysy Almasbek Jumadilov, Qazaq ǵylymı-zertteý mádenıet ınstıtýtynyń bas dırektory Andreı Hazbýlatov, Kolýmbııa ýnıversıtetiniń professory Rafıs Abazov, «Ambrozıana» akademııasy Azııa synybynyń ǵalym hatshysy, professor Edoardo Kanetta, MondoMostre halyqaralyq jobasynyń jetekshisi Marııa Azzýra La Roza, Mılannyń mádenıet jónindegi komıssııasynyń tóraǵasy Paolo Bossı, prodıýserler, kıno synshylary jáne Mılan qalasynyń turǵyndary qatysty.
Kórsetilim aldynda Qazaq ǵylymı-zertteý mádenıet ınstıtýtynyń bas dırektory Andreı Hazbýlatov Qazaqstan Mádenıet jáne sport mınıstri Arystanbek Muhamedıulynyń atynan quttyqtaý sóz sóıledi. Onda: «Azııa, Afrıka jáne Latyn Amerıkasy fılmderiniń kıno festıvali - bul shyn máninde halyqaralyq kıno ındýstrııasy úshin úlken mádenı oqıǵa. Kıno festıval kóptegen elder úshin qazirgi zamanǵy qoǵamdy damytýdyń ajyramas atrıbýtyna, shyǵarmashylyq alys-beris úshin tamasha alańǵa aınalǵan. Onda árkimge de óz eliniń mádenıetin kórsetýge biregeı múmkinshilik berilgen. Qazaqstan kıno festıvalge alǵash ret qatysyp, uly ıtalıandyq saıahatshy týraly «Marko Polonyń Jibek joly» ǵylymı-kópshilik fılmin usynyp otyr», - delingen.
Sonymen qatar Hazbýlatov fılmniń túsirilim jumystary Italııa, Qytaı jáne Qazaqstan jerinde júrgizilgendigin atap ótti. Fılmge otandyq jáne halyqaralyq ǵalymdar, saıahatshynyń ómir jolyn zerttep júrgen sarapshylar qatysqan. Aǵymdaǵy jyly fılmdi Qytaı, AQSh jáne Eýropa elderinde kórsetý josparlanyp otyr.
Aıta keteıik, «Marko Polonyń Jibek Joly» ǵylymı-kópshilik fılmi áıgili ıtalıandyq kópes Marko Polonyń Uly dala saıahattary týraly kitabynyń jelisi negizinde túsirilgen. Fılmde Ortalyq Azııa men qazirgi Qazaqstan shekarasyna erekshe nazar aýdarylǵan. Rejısserlik sheshim ǵylymı pikirtalas pen tarıhı qaıta qurýdy ushtastyrýdyń negizinde quralǵan.
