Marko Polo, Muhammed Álı Djınna: elordada birneshe kóshege sheteldik tulǵalardyń esimi beriledi

ASTANA. KAZINFORM — Astanada birneshe ataýsyz kóshege sheteldik tulǵalar men qala ataýyn berý týraly usynys jasaldy. Tolyǵyraq Astana qalasynyń tilderdi damytý jáne arhıv isi basqarmasynyń basshysy Sáken Esirkep aıtyp berdi. 

— Astanada birneshe kóshege sheteldiń eki tulǵasynyń jáne bir qala ataýyn berý týraly usynyspen kelip otyrmyn. Bul usynystar Qazaqstannyń ózge memlekettermen dıplomatııalyq qarym-qatynasty jaqsartýǵa negizdelip pysyqtalǵan. Birinshi usynys Nura aýdanynda ornalasqan kóshege Sofııa ataýyn berý, aıta ketý kerek búginde Bolgarııanyń elordasynda «Astana» ataýy berilgen kóshe bar. Kelesi taǵy da Nura aýdanyndaǵy kóshege Pákistannyń saıası qaıratkeri Muhammed Álı Djınnanyń esimin berýdi usynyp otyrmyz. Ol musylman saıası qaıratker retinde aýqymdy jumyspen aınalysqan, zamanaýı Pákistan memleketiniń negizin qalaýshylardyń biri, — Sáken Esirkep máslıhattyń kezekten tys sessııasynda.

Onyń aıtýynsha, óz kezeginde Pákistan eli astanasy Islamabadta uly Abaıdyń atyna kóshe berýdi josparlap otyr. 

— Úshinshi usynys Italııa memleketine baılanysty Turan dańǵylynan bastalyp, Qabanbaı batyr dańǵyly aralyǵynda «Astana-Arena» sport kesheni men «Alaý» muz aıdyny ortasynda ornalasqan ataýsyz kóshege Makro Polonyń esimin berýdi usynamyz. Marko Polony bárińiz jaqsy bilesiz HІІІ-XIV ǵasyrda ómir súrgen ataqty kópes, jıhankez, saıahatshy. Artyna kóptegen derek qaldyrǵan, onyń ishinde bizdiń tarıhymyzǵa da qatysty málimetter bar, — dep túıindedi basqarma basshysy.

Qalalyq máslıhat depýtattary atalǵan usynystardy bir aýyzdan qoldady, endi usynys Úkimet janyndaǵy onomastıkalyq komıssııa otyrysynda qaralady. 

Eske sala ketsek, Memleket basshysy Qasym-Jomart Toqaev bıyl Ulttyq quryltaıda ataýsyz kóshelerdi retteýdi tapsyrdy. 

Aıta keteıik, osy jazda elorda kósheleriniń birine armııan álipbıiniń negizin qalaǵan Mesrop Mashtotstyń esimi beriletini týraly jazǵan edik.