Marketpleıster qazaqstandyq taýarlardy keńinen kórsetýge mindettelýi múmkin

Saýda jáne ıntegratsııa mınıstrligi onlaın-platformalar men saýda jelilerinde otandyq ónimderdi ilgeriletý talaptaryn kúsheıtip jatyr.

Bul týraly Saýda jáne ıntegratsııa mınıstriniń mindetin atqarýshy Aıjan Bıjanova «Saýda jelilerinde “Qazaqstanda jasalǵan” ulttyq brendin ilgeriletý» taqyrybyndaǵy dóńgelek ústelde málimdedi.

Onyń aıtýynsha, jańa talaptar boıynsha marketpleıster qazaqstandyq ónimder úshin arnaıy bólimder quryp, olardy izdeý nátıjelerin de joǵary kórsetýge mindetteledi.

Qazirgi ýaqytta tıisti zańnamalyq túzetýler paketi múddeli memlekettik organdarmen kelisilip jatyr.

Vedomstvo málimetinshe, qoldanystaǵy zańnama boıynsha saýda nysandaryndaǵy qazaqstandyq taýarlardyń úlesi keminde 30 paıyz bolýy tıis.

Budan bólek, «Damý» qorynyń baǵdarlamalary arqyly sóre keńistiginiń taǵy 20 paıyzyna deıin otandyq ónimderge bólinýi múmkin.

– Tutynýshynyń otandyq ónimdi kórýi de mańyzdy. Sondyqtan zańnama tek sandyq kórsetkishterge ǵana emes, taýardy ornalastyrý sapasyna da talap qoıady. Otandyq ónim satyp alýshynyń kóz deńgeıinde, qoljetimdi jerde ornalasýy tıis. Bul – «altyn sóre», – dedi Aıjan Bıjanova.

Nazarbaev Ýnıversıteti janyndaǵy Ulttyq analıtıkalyq ortalyq júrgizgen zertteý de mundaı tásilderdiń tıimdi ekenin kórsetken.

Magnum saýda jelisimen birlesken eksperıment barysynda qazaqstandyq irimshikterdi jarnamalaýǵa arnalǵan bannerler, stıkerler, sóre lentalary jáne aýdıohabarlamalar qoldanylǵan.

Tórt aptaǵa sozylǵan pılottyq joba nátıjesinde qazaqstandyq irimshik satylymy 20 paıyzǵa artqan.

– Bul halyqaralyq tájirıbedegi ortasha kórsetkishten áldeqaıda joǵary. Eksperıment nátıjesi qazaqstandyqtardyń «ekonomıkalyq patrıotızmge» daıyn ekenin kórsetti, – dedi Saltanat Djanenova.

Ulttyq analıtıkalyq ortalyqtyń Memlekettik basqarý jáne minez-qulyqtyq memlekettik saıasat ortalyǵynyń dırektorynyń aıtýynsha, tutynýshyǵa tańdaý jasaýǵa kómektesý úshin otandyq ónimdi kózge kórinetin etý qajet.

Mınıstrlik zańnama talaptarynyń saqtalýyna baqylaýdy da kúsheıtpek.

Vedomstvo málimetinshe, otandyq taýarlardyń saýda jelilerine qoljetimdiligin shekteý, jetkizýshilermen jumys talaptaryn buzý jáne nusqamalardy oryndamaý faktileri úshin aıyppul qarastyrylǵan.

Sonymen qatar mınıstrlik «ónimsiz deldal» uǵymyn engizý, saýda kedergilerine baqylaýdy kúsheıtý jáne bos saýda oryndary bolǵan jaǵdaıda otandyq óndirýshilerge basymdyq berý jónindegi zańnamalyq ózgeristerdi ázirlep jatyr.

Aıta keteıik, marketpleıster arqyly alynǵan taýarlarǵa qatysty jańa kedendik talaptar enedi.