Marketpleıster qazaq tilinde qyzmet kórsetýge mindetteledi - Saýda mınıstrligi
ASTANA. KAZINFORM – Qazaqstanda marketpleıster men satýshylar qazaq tilinde qyzmet kórsetýge mindetteledi. Bul týraly Saýda jáne ıntegratsııa mınıstri Arman Shaqqalıev aıtty.
Búgin Májilistiń jalpy otyrysynda tutynýshylardyń quqyqtaryn qorǵaý týraly zań jobasyn talqylaý kezinde depýtat Rınat Zaıtov qyzmetterdi qazaq tilinde usynýda problema bar ekenin jáne bul máseleni tıisti zańmen retteýdi usyndy.
Palata otyrysynan keıingi baspasóz máslıhatynda vedomstvo basshysy osy taqyrypqa qatysty túsinik berdi.
«Depýtat tutynýshylardyń tolyqqandy sapaly qyzmet alý máselesin kóterdi jáne bul turǵyda onyń aıtqany ábden oryndy. Bizde tilge baılanysty shekteýge nemese kemsitýge jol berilmeıdi. Atap aıtqanda, elektrondy saýdada keıbiri ana tilinde qyzmet kórsetpeıdi, osynyń saldarynan tutynýshy ony paıdalana almaıdy. Bul rette, adamdar nege zardap shegýi kerek?! Adamdar naqty ári senimdi aqparat alýy qajet. Osy oraıda biz tilge qatysty konstıtýtsııalyq ustanym men zań talaptaryn oryndaý máselesine erekshe nazar aýdaramyz. Bul óz kezeginde marketpleısterge de jáne basqa da qyzmetterge de qatysty», - dedi Arman Shaqqalıev tilshiler suraǵyna jaýap bere otyryp.
Budan buryn habarlanǵandaı, QR Saýda jáne ıntegratsııa mınıstri kólik turaqtaryn jappaı aqyly negizge aýystyrý jóninde suraqtarǵa jaýap berdi.
