Marketpleıster arqyly alynǵan taýarlarǵa qatysty jańa kedendik talaptar enedi

ASTANA. KAZINFORM — Qazaqstanda sheteldik marketpleıster arqyly jasalatyn onlaın saýdaǵa qatysty ereje ózgeredi. Bul týraly QR Qarjy mınıstrliginiń Memlekettik kirister komıteti málim etti. 

Jańa ózgeristerge sáıkes, sheteldik marketpleısterden jeke tulǵalar satyp alyp, halyqaralyq poshta jóneltilimderi nemese tasymaldaýshylar arqyly jetkiziletin taýarlar budan bylaı «jeke paıdalanýǵa arnalǵan taýarlar» dep atalmaıdy. Olar «elektrondyq saýda taýarlary» degen jeke sanatqa bólinedi.

— Atalǵan taýarlardyń barlyǵy mindetti túrde kedendik deklaratsııalaýǵa jatady. Ol úshin «elektrondyq saýda taýarlaryna arnalǵan deklaratsııa» dep atalatyn jańa úlgidegi qujat engiziledi. Alaıda satyp alýshylar deklaratsııany ózderi toltyrmaıdy jáne tapsyrmaıdy — bul rásimniń barlyǵyn «elektrondyq saýda operatorlary» júzege asyrady. ıAǵnı burynǵydaı, jeke tulǵa sálemdemeni berý pýnktinen ózi alady nemese kýrer arqyly jetkizip alady, — delingen habarlamada.

Negizgi ózgerister quny bajsyz ákelý sheginen asatyn taýarlarǵa qatysty bolady. Qazirgi qoldanystaǵy tártip boıynsha, eger taýardyń quny 200 eýrodan (shamamen 120 myń teńge) assa nemese salmaǵy 31 keliden joǵary bolsa, artyq bóligine 15% mólsherinde kedendik baj jáne salyq tólenedi, ne bolmasa keminde 1 kılogramyna 2 eýro esepteledi.

Túzetýler kúshine engennen keıin kedendik baj mólsherlemesi ózgeredi: eger taýardyń quny 200 eýrodan assa, búkil qunynyń 5%-y mólsherinde baj salyǵy salynady. Sonymen qatar keminde 1 kılogramyna 1 eýro tóleý talaby saqtalady. ıAǵnı tólem eki kórsetkishtiń (quny nemese salmaǵy boıynsha) joǵarysy boıynsha esepteledi. Buǵan qosa, 16% mólsherinde qosylǵan qun salyǵy (QQS) tólenedi.

Vedomstvonyń málimetinshe, 200 eýro kólemindegi bajsyz ákelý shegi saqtalady, al salmaq boıynsha shekteý alynyp tastalady. Osylaısha, eger sálemdemeniń quny 200 eýrodan aspasa, jeke tulǵalar burynǵydaı eshqandaı tólem jasamaıdy.

Kedendik rásimderdiń barlyǵyn «elektrondyq saýda operatorlary» atqarady. Olar taýarlardy jetkizýge, saqtaýǵa, kedendik deklaratsııalaýǵa jáne tapsyrýǵa jaýapty kásibı naryq qatysýshylary bolady.

Elektrondyq saýda operatorlaryna qatysty keden zańnamasyna jańa bólim engiziledi. Onda operatorlardy arnaıy tizilimge engizý sharttary, olardyń quqyqtary men mindetteri, jaýapkershiligi, sondaı-aq qyzmetin toqtatý nemese tizilimnen shyǵarý tártibi aıqyndalady.

Memleket basshysy qol qoıǵan Eýrazııalyq ekonomıkalyq odaqtyń Keden kodeksine engizilgen atalǵan túzetýlermen «Ádilet» aqparattyq-quqyqtyq júıesinde tanysýǵa bolady. Ózgerister EAEO týraly shartqa engizilgen hattama ratıfıkatsııalanǵannan keıin kúshine enedi. Qazirgi ýaqytta hattamany EAEO-ǵa múshe memleketterdiń barlyǵy ratıfıkatsııalaǵan, tek Reseı Federatsııasy ǵana bul sanatqa kirmeıdi. 

Eske sala keteıik, buǵan deıin Eýrazııalyq ekonomıkalyq komıssııa keńesinde sheteldik marketpleısterden satyp alynatyn elektrondyq saýda taýarlaryn ákelýdiń jańa sharttary men erejeleri qabyldanǵan bolatyn.