Market platformasy: qurylys kompanııalary úsh jylǵa deıin páter baǵasyn ósirmeıdi

ASTANA. KAZINFORM — Búgin Úkimet otyrysynda bazalyq mólsherlemeniń kóterilýine baılanysty ekinshi deńgeıli bankter tarapynan ıpotekalyq baǵdarlamalar boıynsha usynystardyń qysqarýy aıasynda turǵyn úı-qurylys jınaq júıesin qoldaý týraly sheshim qabyldandy. Bul týraly Úkimettiń baspasóz qyzmeti málim etti.

«Otbasy bank» AQ basqarma tóraǵasy Lázzat Ibragımova bul sharalar azamattarǵa jeke baspana alýǵa múmkindik beretin baǵdarlamalar qataryn keńeıtetinin aıtty.

—  Memleket basshysy Qasym-Jomart Kemeluly Toqaevtyń tapsyrmasy boıynsha Úkimet halyqtyń ómir súrý sapasyn arttyrýǵa baǵyttalǵan naqty sharalar qabyldady. Sońǵy aptada azamattarda ıpoteka rásimdeý boıynsha qıyndyqtar týyndap jatqany bárińizge málim. Osyǵan baılanysty Úkimet turǵyn úı qurylys jınaq júıesin qoldaý týraly sheshim qabyldady.  Keleshekte halyqqa baspana qoljetimdi bolýy úshin ıpotekalyq nesıe kólemi eki ese artty. Qarasha aıynda «Naýryz1» jáne «Naýryz jumysker» baǵdarlamalary bastalady. Jalpy, 500 mlrd teńge kóleminde nesıe beriledi, — dedi «Otbasy bank» AQ basqarma tóraǵasy.

Buǵan qosa, Lázzat Ibragımova «Áskerı baspana» baǵdarlamasy qaıta iske qosylady. Osy baǵdarlamanyń arqasynda shamamen 7 myń áskerı qyzmetker daıyn páter satyp ala ala alatynyn aıtty.

Basqarma tóraǵasynyń sózinshe, barlyq páter Baspana market platformasy arqyly satylady. Páterlerdiń baǵasy memleket baqylaýynda bolady.

— Qazirgi tańda qurylys kompanııalary 36 aıǵa deıin páter baǵasyn ósirmeıtini týraly aldyn ala kelisimshartqa otyrady, — dedi ol.

Aıta keteıik, Qazaqstanda ıpoteka boıynsha mólsherlemeni 25%-dan 20%-ǵa deıin tómendetý normasynyń kúshi ýaqytsha toqtatyldy.