Marqakólde jergilikti halyqtyń balyq aýlaý erejesi ózgerdi
«Marqakóldegi ahýalǵa Qazaqstan Prezıdenti Qasym-Jomart Toqaev aıryqsha nazar aýdaryp otyr. Ótken jylǵy shildede Prezıdent Shyǵys Qazaqstan oblysy Marqakól kólindegi uıymdasqan-qylmystyq top áreketiniń jolyn kesýdi tapsyrǵan edi. «Quqyq qorǵaý organdaryna Marqakól kólindegi UQT áreketiniń jolyn kesý týraly tapsyrma berdim. Brakonerler ýyldyryqty kóptep óndirý úshin bul jerde maıqan balyǵyn zańsyz aýlaýda. Bul baqylaýǵa alynady», - degen edi Memleket basshysy. Ýyldyryq shashý kezeńinde balyq qoryn saqtaýdy kúsheıtý úshin 1 mamyrdan 30 maýsymǵa deıin Marqakóldiń aınalasynda, ýyldyryq shashatyn ózenderde balyq qoryn táýlik boıy qorǵaýǵa arnalǵan 12 beket ornatyldy», - dep habarlady mınıstrliktiń baspasóz qyzmeti.
Mınıstrlik prokýratýra, polıtsııa, «Ohotzooprom» RMQK, ınspektsııamen jáne t.b. uıymdarmen birlesken 600 jedel reıdtik shara jáne 11 reıd ótkenin baıandady.
«Mamyr aıynda Urańqaı ózeninde jalpy maıqan tuqymdas 2 balyq ustaǵan eki jergilikti turǵyn ustaldy. Kúrshim aýdanynyń №2 aýdandyq sotynyń sheshimimen kináliler aıyppul túrinde ákimshilik jaýapkershilikke tartyldy. Aıyppuldar men zalaldar tolyǵymen óndirildi. Marqakól qoryǵy aýmaǵynda balyq resýrstaryn, basqa da sý janýarlary men ósimdikterin zańsyz alý boıynsha qylmystyq isterdi sotqa deıingi tergeý jalǵasýda. Maýsym aıynda 10 kúdiktige qatysty qylmystyq sot otyrysy ótip, materıaldar qosymsha tergeýge qaıtaryldy», - deıdi vedomstvo.
Sondaı-aq, bıylǵy naýryz aıynda qyzmettik tergeý nátıjeleri boıynsha belgisiz bireýlerdiń Marqakól kólinen zańsyz balyq aýlaý faktileri týraly aqparat rastalmady. Orman sharýashylyǵy jáne janýarlar dúnıesi komıteti ishki tekserý júrgizdi.
«Jyl basynan beri Ekologııa mınıstrligi qoryq aımaǵyndaǵy Marqakól kólinde jergilikti halyqtyń balyq aýlaý erejelerine ózgerister engizdi. Arnaıy belgilengen balyq aýlaý alańdarynyń sany tórtten birge deıin azaıtyldy. Bul jer Marqakól kóliniń soltústik-shyǵys bóliginde, Ýrýnhaıka aýylyna jaqyn jerde ornalasqan. Taǵy bir ózgeris – balyq aýlaýǵa joldama turǵylyqty jeri boıynsha tirkelgen jeke tulǵalarǵa ǵana beriledi. Sondaı-aq, Mınıstrlik QR Parlamenti Májilisine maıqan balyǵyn úshinshi tulǵalarǵa satýǵa tyıym salý týraly jáne Marqakól kólinde jyrtqysh qustardy (sýquzǵyn) retteý týraly erejesin usynyp otyr. Qazirgi ýaqytta sýquzǵyndar sany 2019 jylmen salystyrǵanda 20 ese azaıdy jáne shamamen 450-i ǵana qaldy», - deıdi Ekologııa mınıstrligi.
